काळजी घेतली नाही तर कोरोनाची रुग्णसंख्या पुन्हा वाढण्याचा धोका

अहमदनगर : सोमवार (दि. ७)पासून लॉकडाऊन शिथिल झाले. अहमदनगर जिल्हा निर्बंध स्तर-१मध्ये येत असल्याने जिल्ह्यातील सर्व निर्बंध पूर्णपणे शिथिल करण्यात आले. त्यामुळे सर्व बाजारपेठ खुली झाली, दुकाने उघडली. भाजीपाल्यासह इतर खरेदीसाठी गर्दी वाढली. नियमांचे पालन करण्याबाबत निष्काळजीपणा वाढला. एक जूनपासून कमी होत जाणारी कोरोनाची रुग्णसंख्या गुरुवारी अचानक वाढली. जिल्ह्यात ८६८ जणांचा कोरोना चाचणी अहवाल पॉझिटिव्ह आल्याने प्रशासनासह नागरिकांचीही झोप उडाली आहे.

निर्बंध उठवले असले तरी लोकांनी निष्काळजीपणा दाखवला तर काय होऊ शकते, हेच वाढलेल्या रुग्णसंख्येतून दिसून आले आहे. कोरोनाची रुग्णसंख्या पुन्हा वाढण्याची शक्यता आहे. त्यामुळे प्रशासनानेही कोरोना प्रतिबंधात्मक नियमांचे पालन होते की नाही, हे पाहण्यासाठी नियंत्रण ठेवणार का? याकडे लक्ष लागले आहे. ४ जून रोजी जिल्ह्याचा पॉझिटिव्ह रेट ४.३०, तर ऑक्सिजन बेडचे प्रमाण २४ टक्के इतके होते. त्यामुळे अहमदनगर जिल्हा निर्बंध स्तर १ (लेवल १)मध्ये समाविष्ट झाला. त्यामुळे सर्वच निर्बंध उठविण्यात आले. ७ जूनपासून जिल्ह्यातील सर्व दुकाने, बाजारपेठा उघडल्या. नेहमीप्रमाणे रस्त्यावर गर्दी उसळली. त्यामुळे कोरोनाची रुग्णसंख्या पुन्हा वाढत असल्याचे दिसते आहे. रुग्णसंख्या अशीच वाढत राहिली तर जिल्ह्यात पुन्हा लॉकडाऊन लागू शकतो, अशीच स्थिती तयार झाली आहे. बुधवारी ४९९ इतके रुग्ण होते. दुसऱ्या दिवशी ही संख्या जवळपास दुप्पट झाली. गुरुवारी कोरोनाचे ८६८ रुग्ण आढळले. उपचार सुरू असणाऱ्या रुग्णांची संख्या ४ हजार ५५४ इतकी आहे. गुरुवारी जिल्हा रुग्णालयाच्या कोरोना टेस्ट लॅबमध्ये १०३, खासगी प्रयोगशाळेत केलेल्या तपासणीत ४६४ आणि अँटिजन चाचणीत ३०१ रुग्ण बाधित आढळले. त्यामध्ये अहमदनगर शहर (३९), राहाता (२२), संगमनेर (५५), श्रीरामपूर (३४), नेवासे (१११), नगर तालुका (४३), पाथर्डी (९५), अकोले (६८), कोपरगाव (६९), कर्जत (३७), पारनेर (७४), राहुरी (३६), भिंगार (६), शेवगाव (८३), जामखेड (११), श्रीगोंदे (७३), इतर जिल्हा (११) येथील रुग्णांचा समावेश आहे. नगर शहरातही २०, २२, १० अशी रुग्णसंख्या आढळून आली होती. ती गुरुवारी थेट ३९वर पोहोचली आहे. नेवाशेत सर्वाधिक १११ रुग्ण आढळले आहेत.

----------

दहा दिवसातील पॉझिटिव्ह आणि मृत्यूची नोंद

तारीख पॉझिटिव्ह मृत्यू

१ जून- १,१५२ २६

२ जून ८५८ ६४

३ जून १,३२६ २०

४ जून ७७१ २९

५ जून ८४३ ५

६ जून ९१४ ४०

७ जून ५३० ३०

८ जून ५३४ १८

९ जून ४९९ ४०

१० जून ८६८ २४

-----------

एकूण कोरोना स्थिती

बरे झालेली रुग्ण संख्या : २,६२,०८१

उपचार सुरू असलेले रुग्ण : ४,५५४

मृत्यू : ३,७९५

एकूण रुग्ण संख्या : २,७०,४३०

----------