बोगस डॉक्टरांना जिल्ह्यात नाही थारा

ग्रामीण भागात बोगस डाॅक्टरांचा नेहमीच सुळसुळाट असतो. जिल्हा आरोग्य अधिकाऱ्यांच्या पथकाने कारवाईचा इशारा दिल्याने जिल्ह्यात एकही बोगस डॉक्टर आढळून आला नाही. मात्र, तक्रार नसल्याने कारवाई केली नसल्याचे प्रशासनाने म्हणणे आहे. तक्रार आली तरच कारवाईची भूमिका असल्याने जिल्ह्यातही बोगस डॉक्टरांचे ‘चोरी चोरी चुपके चुपके’ धंदा सुरू असण्याचीच शक्यता आहे. वैद्यकीय शिक्षणात कुठलीही पदवी मिळविली की, स्वत:च्या नावापुढे डाॅक्टर लावण्याची कायद्यानेच परवानगी मिळते. मात्र, स्वत:चे मूळ शिक्षण लपवून अनेक जण एमबीबीएस, बीएएमएस असल्याचे भासवितात. ग्रामीण भागात त्याची फारशी शहानिशा कोणी करत नसल्याने हा प्रकार अलीकडच्या काळात अधिकच फोफावला आहे. अशा बोगस डाॅक्टरांमुळे मात्र वेळप्रसंगी रुग्णांचा जीवही धोक्यात सापडतो. त्यामुळे चुकीच्या प्रकारावर नियंत्रणासाठी धडक मोहीम राबवावी, अशी मागणी नागरिकांमधून होत आहे.

------------

तक्रार आली तरच कारवाई

ग्रामीण भागातील अधिकांश गावांमध्ये बोगस डाॅक्टर्सकडून रुग्णांवर उपचार केले जात असण्याची शक्यता आहे. मात्र प्रशासनाकडून असे बोगस डॉक्टर शोधण्याची कोणतीही मोहीम आतापर्यंत राबविली गेली नाही. कोरोनाच्या काळात डॉक्टरांची मोठी मदत प्रशासनाला हवी होती. त्यामुळे कारवाई, मोहीम, बोगस डॉक्टर शोधण्याबाबत कोणतीही कारवाई केली नाही. यामुळे कोरोनाच्या उपाययोजनामध्ये अडथळा निर्माण होणार नाही, याची खबरदारी प्रशासनाने घेतल्याचे दिसते आहे.

-----

दवाखान्यात जाण्यापूर्वी खात्री करा

१) एखाद्या तज्ज्ञ डॉक्टरांच्या हाताखाली कंम्पाउडर किंवा परिचारक म्हणून काम केलेल्या काही व्यक्तींनी बोगस दवाखाने उघडल्याचे गेल्या काही वर्षांत समोर आले आहे. काेठून तरी बनावट प्रमाणपत्र मिळवायचे आणि स्वतःचा दवाखाना सुरू करायचा, अशी त्यांची कार्यपद्धती असते. थोडेफार संशयित वातावरण वाटल्यास दवाखाना दुसऱ्या शहरात स्थलांतरित करून रुग्णांच्या जीवाशी खेळ करून बक्कळ पैसा ते कमावतात .

२) काही वर्षे तज्ज्ञांच्या हाताखाली काम केलेले असल्याने हे बोगस डॉक्टरही त्यांच्या इतकेच तज्ज्ञ असतात. साध्या सर्दी तापापासून लहान सहान शस्त्रक्रिया ते सहज करू शकतात. त्यामुळे बोगस डॉक्टर ओळखणे कठीण असते.

३) अशावेळी वैद्यकीय प्रमाणपत्र हेच त्यांना बोगस सिद्ध करण्याचे प्रमुख हत्यार असते. रुग्णांनी डॉक्टरकडे जाण्यापूर्वी पुरेपूर खात्री करून घ्यावी. खोट्या प्रमाणपत्र आधारे प्रॅक्टिस करणारा औषधांची नावे किंवा आजाराचे वैद्यकीय नाव उच्चारताना बऱ्याचदा गफलत करतो. असा प्रकार तुमच्यासोबत घडल्यास तत्काळ पोलीस स्थानकात कळवा.

..........

कोरोना काळात किती बोगस डॉक्टरांची धरपकड – ००

विनापरवाना सुरू असलेल्या दवाखान्यांवर कारवाई - ००

डमी- ८४९