ट्रकच्या अपघातात एक जण जखमी

कोपरगाव : रस्ता ओलांडताना मागून भरधाव येणाऱ्या मालट्रकने वृद्धाला जोराची धडक दिली. त्यानंतर ट्र्कच्या चाकाखाली चिरडले. ही मंगळवारी ( दि.२ मार्च ) सकाळी ११ वाजेच्या सुमारास कोपरगाव शहरातील नगर - मनमाड महामार्गावरील अपना बाजारसमोर घडली आहे. निवृत्ती तुळशीराम कहांडळ (वय ६८, रा. काहंडळवाडी वावी, ता. सिन्नर जि. नाशिक ) असे या घटनेतील जखमी व्यक्तीचे नाव आहे, अशी माहिती पोलीस सूत्रांनी दिली आहे.

कोपरगाव शहरातील अपना बाजार येथे जखमी निवृत्ती हे आपल्या कामानिमित्त आले होते. काम झाल्यानंतर नगर - मनमाड रस्ता ओलांडून दुसऱ्या बाजूस चहा घेण्यासाठी जात होते. तितक्यात शिर्डीच्या दिशेने भरधाव चाललेल्या मालट्रकने (टी. एन. ५२, एफ. ९२५९ ) काहंडळ यांना जोराची धडक दिली. ते खाली पडले व त्यांच्या दोन्ही पायावरून ट्रकचे चाक गेल्याने ते गंभीर जखमी झाले. शहर पोलिसांना घटनेची माहिती मिळताच तत्काळ घटनास्थळी हजर झाले होते.

दरम्यान घटनास्थळी असलेल्या अपना बाजार येथील युवक मोसीन सय्यद, मक्का तांबोली, मुन्ना शेख तसेच रुग्णवाहिका चालक अमित खोकले व इतरांनी मदत करून जखमी आजोबांना रुग्णवाहिकेतून उपचारासाठी खासगी रुग्णालयात दाखल केले होते. दरम्यान शहर पोलीस ठाण्याचे पोलीस निरीक्षक वासुदेव देसले, पोलीस कॉन्स्टेबल राम खरतोडे, संभाजी शिंदे यांनी घटनास्थळी भेट देऊन ट्रक चालकाला ताब्यात घेतले आहे.