खवले मांजर तस्करी करणारी टोळी पकडली

पुणे येथील वनविभागाचे वनपरिक्षेत्र अधिकारी दीपक पवार, वनरक्षक मयूर बोठे यांना गुप्त खबऱ्यामार्फत माहिती मिळाली. सातारा येथे दुर्मीळ खवले मांजराची विक्री होणार असल्याची माहिती मिळाली होती. त्यानुसार या अधिकाऱ्यांनी सापळा रचला. तस्करी करणाऱ्यांना संशय आल्याने त्यांनी जागा बदलून पुणे या ठिकाणी विक्री करण्याचे ठरवले. मात्र पुणे येथेही वनविभागाचे अधिकारी आपला पाठलाग करत असल्याचा तस्करांना संशय आल्याने विक्री स्थगित केली. हे तस्कर बोलेरो जीपमधून खवले मांजर घेऊन पुणे-नाशिक महामार्गाने संगमनेर तालुक्यातील खंदरमाळ शिवारात गेल्याचे वनविभागाला समजले. पुणे येथील वनअधिकारी व कर्मचाऱ्यांनी त्यांचा पाठलाग सुरू केला. घटनेची माहिती घारगाव वनविभागाचे वनपरिमंडळ अधिकारी रामदास थेटे, सामाजिक कार्यकर्ते किशोर डोके, पोलीस मदत केंद्राचे पोलीस उपनिरीक्षक भालचंद्र शिंदे हे वनविभागाच्या मदतीला धावले.

तस्कर नजर चुकवून डाळिंब शेतात पळाले. डोके यांनी मोबाइलवरून ग्रामस्थांना कळविले. रामनाथ कजबे, बाळासाहेब कजबे यांसह आदी ग्रामस्थांनी या तस्करांचा अर्धा किलोमीटरवर पाठलाग करून पकडले. तस्करांना वनविभागाच्या स्वाधीन केले. चौघांपैकी एकजण दुचाकी सोडून पळून गेला. दरम्यान,तीन जणांकडून वनविभागाच्या अधिकाऱ्यांनी खवले मांजर, बोलेरो जीप, एक मोबाइल, वाघनखे जप्त केले आहे. तस्करी करणारे तिघेजण पुणे वनविभागाने ताब्यात घेतले असून त्यांना पुणे येथे नेण्यात आले आहे. तस्करांची नावे मात्र समजू शकली नाही.