फुकटच्या ॲपमुळे शाळांची डोकेदुखी

अहमदनगर : कोरोनामुळे सध्या विद्यार्थ्यांना ऑनलाइन वर्गाचा आधार ठरत असला तरी हेच ऑनलाइन वर्ग विद्यार्थ्यांसाठी धोकादायक ठरत आहेत. ऑनलाईन क्लास सुरू असताना अश्लील मेसेज, व्हिडिओ अशा अनेक अनावश्यक वेबसाइट ओपन होत असल्याने विद्यार्थी विचलित होण्याचे प्रकार घडत आहेत.

कोरोनाच्या पार्श्वभूमीवर गेल्या दीड वर्षापासून शाळा ऑनलाईन सुरू आहेत. ऑनलाईन शिक्षण सुरू असल्यामुळे पालकांना नाइलाजाने विद्यार्थ्यांना नवीन मोबाईल घेऊन द्यावे लागत आहेत. त्यामुळे पालकांचा आर्थिक खर्च वाढला आहे. सोबतच ऑनलाईन शिक्षणामुळे शाळांची, शिक्षकांची व पालकांची देखील डोकेदुखी वाढली आहे. कारण ऑनलाईन शिक्षण सुरू असताना इंटरनेट आवश्यक असते आणि कुठल्याही शैक्षणिक लिंकवर गेले असता, नको त्या जाहिरातीच्या लिंक, तसेच नको त्या अश्लील लिंक, चित्र, व्हिडिओ समोर येतात. विद्यार्थी कुतूहलापोटी व उत्सुकतेपोटी लिंकला छेडतात. कधी अनवधानाने, तर कधी मुद्दाम विद्यार्थी व्हिडिओ ग्रुपवर सेंड करतात. त्यामुळे इतर विद्यार्थ्यांना व शिक्षकांनाही त्याचा त्रास होतो. पालकांनाही अनेक समस्यांना सामोरे जावे लागत आहे. अनेकदा कुतूहलापोटी विद्यार्थी हे व्हिडिओ पाहतात. त्यामुळे त्यांच्या बालमनावर वाईट परिणामही होत आहे.

-------------

शाळांनी घ्यावयाची काळजी...

ऑनलाईन वर्ग घेत असताना शिक्षकाला वर्गातील सर्व विद्यार्थ्यांची ओळख असायला हवी. ऑनलाईन वर्गात खोड काढणाऱ्या विद्यार्थ्यांच्या बाबतीत चौकस असण्याची गरज आहे. शिक्षकांनी पाठविलेली लिंक विद्यार्थ्यांनी इतरांना पाठवू नये, याची जाणीव विद्यार्थ्यांना करून देण्याची गरज आहे. तसेच अशा अनावश्यक वेबसाइट ओपन झाल्या तर त्याकडे कसे दुर्लक्ष करायचे याबाबतही मार्गदर्शन हवे.

------------

पालकांनी घ्यावयाची काळजी...

ऑनलाईन क्लास सुरू असताना विद्यार्थी काय पाहतो आहे याकडे पालकांनी जरूर लक्ष द्यावे. शक्यतो मुलांची क्लासला बसण्याची जागा पालकांचे लक्ष असेल अशा ठिकाणी असावी. क्लास झाल्यानंतर मोबाईल तपासून पाहावा. मुलांचे चुकीच्या गोष्टीबाबत समुपदेशन करणे गरजेचे आहे. शक्यतो ऑनलाईन वर्गानंतर मुलांकडे मोबाईल देऊच नये.

-----------

सायबरतज्ज्ञांचा सल्ला महत्त्वाचा

शाळा ज्या ॲपच्या माध्यमातून ऑनलाईन शिक्षण घेते, त्या ॲप्सचे प्रीमियम व्हर्जन घ्यावे. कारण त्यात जास्त सुरक्षितता असते. ते ॲप्स हाताळण्यासाठी, त्यातील बारकावे शिक्षकांना अवगत करून देण्यासाठी त्यांची कार्यशाळा घेणे गरजेचे आहे, असे सायबरतज्ज्ञांचे म्हणणे आहे.