शेवगाव, पाथर्डीला अतिवृष्टीचे सर्वाधिक अनुदान

शेवगाव व पाथर्डी तालुक्यात पिके पूर्णतः वाया गेल्याने तातडीने नुकसानभरपाई मिळणे आवश्यक होते. याकरिता जिल्हा प्रशासन व शासनाकडे वेळोवेळी पाठपुरावा केला. या वेळी शेवगाव व पाथर्डी तालुक्यासाठी ७६ कोटी ५० लाख रुपये अनुदानाची मागणी करण्यात आली. केलेल्या मागणीप्रमाणे शेवगाव व पाथर्डी तालुक्यातील २०० पेक्षा जास्त गावांतील सुमारे ९२ हजार शेतकऱ्यांना ६९ कोटी ९३ लक्ष रुपये अनुदान वितरित करण्यात आल्याचे आमदार मोनिका राजळे यांनी सांगितले.

शेवगाव तालुक्यातील १११ गावांतील ५५ हजार ८७१ शेतकऱ्यांना ४४ कोटी ७२ लाख तर पाथर्डी तालुक्यातील ९५ गावांतील ३६ हजार ९७२ शेतकऱ्यांना २५ कोटी २१ लाख रुपये अनुदान प्राप्त झाले आहे. शेवगाव व पाथर्डी तालुक्यातील २०० पेक्षा जास्त गावांतील सुमारे ९२ हजार शेतकऱ्यांना ६९ कोटी ९३ लाख रुपये अनुदान वितरित करण्यात आले आहे. पहिल्या टप्प्यात नोव्हेंबर २०२० मध्ये वितरित करण्यात आले असून दुसऱ्या टप्प्यातील अनुदान प्राप्त झाले आहे. महसूल प्रशासनाचे अनुदान वितरित करण्याचे काम चालू असून लवकरच शेतकऱ्यांच्या खात्यावर वितरित करण्यात येईल. काही तांत्रिक कारणामुळे काही शेतकऱ्यांना अनुदान जर मिळाले नसेल तर खात्री करून सदर अनुदान वितरित करण्याच्या सूचना प्रशासनाला केल्या असल्याचे आमदार राजळे यांनी सांगितले.