शिवसेनेतील अंतर्गत कलह चव्हाट्यावर; नगरसेविकेच्या दिराला मारहाण

अहमदनगर: महापौर निवडीवरून शिवसेनेतील अंतर्गत कलह चव्हाट्यावर आला असून मंगळवारी रात्री दोन गटात चांगलाच राडा  झाला.

यावेळी नगरसेविकाच्या दिराला मारहाण करण्यात आली. याप्रकरणी रात्री उशिरा काहीजण कोतवाली पोलीस ठाण्यात गुन्हा दाखल करण्यासाठी गेले होते मात्र शेवटच्या टप्प्यात हे प्रकरण मिटले. पैशाच्या देवाण-घेवाणीवरुन हा राडा  झाल्याची चर्चा आहे. दरम्यान या घटनेनंतर रात्री नगरसेविका रीता भाकरे यांचे पती निलेश भाकरे यांचा व्हिडिओ व्हायरल झाला असून संभाजी कदम, त्यांचा भाऊ व इतरांनी मारहाण केल्याचे त्यांनी म्हटले आहे. तसेच दुसरा व्हिडीओ व्हायरल झाला असून यामध्ये काही जण एकमेकांना धक्काबुक्की करताना दिसत आहेत. रात्री काही नगरसेवक व शिवसेनेचे पदाधिकारी नगर शहरातील एका हॉटेलमध्ये ओली पार्टी करत होते. यावेळी एकमेकांवर आरोप-प्रत्यारोप करत थेट मारहाणीचा प्रकार घडला.