सुरेगावची सरपंचपदाची निवडणूक स्थगित

विसापूर : श्रीगोंदा तालुक्यातील सुरेगाव ग्रामपंचायतीच्या सरपंचपद निवडीच्या वेळी बहुमत असलेल्या गटाचे पाच सदस्य गैरहजर राहिले. त्यामुळे गणसंख्येअभावी निवडीची बैठक निवडणूक निर्णय अधिकारी एम. एन. बावस्कर यांना तहकूब करावी लागली.

सुरेगाव येथील नुकत्याच पार पडलेल्या ग्रामपंचायत निवडणुकीत कर्मयोगी कुंडलिकराव जगताप कुकडी साखर कारखान्याचे संचालक अंकुशराव रोडे, माजी सरपंच सर्जेराव रोडे यांच्या पॅनेलला सात पैकी पाच जागा मिळवून बहुमत मिळाले. मात्र, आरक्षणात सरपंचपद अनुसूचित जातीच्या महिलेसाठी राखीव निघाले आहे. या पदासाठी दोन सदस्य निवडून आलेल्या डॉ. अनिल मोरे व गुलाब रामफळे, रामकृष्ण रोडे यांच्या पॅनेलच्या मंगल प्रसाद रामफळे यांना सरपंचपदाची लॉटरी लागली. मात्र, बहुमत नसल्याने त्यांना पुढील कार्यवाही होईपर्यंत वाट पाहावी लागणार आहे. राखीव जागा असल्याने त्यांना सरपंचपद मिळाले तरी बहुमत नसल्याने त्यांना कामकाज चालविण्यासाठी कसरत करावी लागणार आहे.

....

सुरेगाव येथील ग्रामपंचायतीत सरपंचपदाचे मागासवर्गीय महिलेसाठी आरक्षण असल्याने त्या पदासाठी मंगल प्रसाद रामफळे यांचा अर्ज दाखल होता. मात्र, सरपंच निवडीच्या बैठकीवेळी आवश्यक गणसंख्या नसल्याने सभा तहकूब करण्यात आली. पुढे ज्यावेळी सरपंच निवडीची प्रक्रिया होईल, त्यावेळी मात्र गणसंख्या आवश्यक असणार नाही.

- एम. एन. बावस्कर, निवडणूक निर्णय अधिकारी, सुरेगाव ग्रामपंचायत.