मलठण येथे एकाच रात्री दोन घरफोड्या

चोरट्यांनी तालुक्यातील मलठण येथे धुमाकूळ घालून एकाच रात्री दोन ठिकाणी घरफोड्या करुन दोन लाखांचा ऐवज नेला.

आॅनलाईन लोकमत
कर्जत, दि़ २८ - चोरट्यांनी तालुक्यातील मलठण येथे धुमाकूळ घालून एकाच रात्री दोन ठिकाणी घरफोड्या करुन दोन लाखांचा ऐवज नेला. रविवारी पहाटे ही घटना घडली. या प्रकरणी अद्याप कोणालाही ताब्यात घेण्यात आलेले नाही.
डॉ. मुबारक याशीन इनामदार उकाड्यामुळे सहकुटुंब घराच्या स्लॅबवर झोपले होते. चोरट्यांनी पहाटे घराचा दरवाजा कटावणीने तोडून घरात प्रवेश करुन घरातील साहित्याची उचकापाचक केली व कपाटात ठेवलेले रोख ३१ हजार रुपये व सात तोळे सोन्याचे दागिने घेऊन पसार झाले. रविवारी सकाळी इनामदार यांच्या हा प्रकार निदर्शनास आला. त्यानंतर त्यांनी कर्जत पोलिसांना माहिती दिली.
मलठण येथीलच तुकाराम शिराळे यांचे घर चोरट्यांनी फोडून घरातील साहित्याची उचकापाचक केली. परंतु चोरट्यांच्या हाती काही लागले नाही. इनामदार व शिराळे यांनी दिलेल्या फिर्यादीनुसार कर्जत पोलीस ठाण्यात चोरीचा गुन्हा दाखल केला असून पुढील तपास सुरु आहे. उकाड्यामुळे नागरिक घराबाहेर झोपतात. ही संधी साधून चोरट्यांनी चोऱ्यांचे सत्र सुरु केले आहे.