रुईछत्तीसीत मतदान शांततेत, निकालाची उत्सुकता

रूईछत्तीसी : नगर तालुक्यातील रुईछत्तीसी येथे ग्रामपंचायत निवडणुकीचे मतदान शांततेत पार पडले. आता येथील उमेदवार, ग्रामस्थांना निकालाची उत्सुकता लागली आहे.

ग्रामविकास मंडळ आणि महाविकास मंडळ ही दोन मंडळे समोरासमोर उभी ठाकली होती. उमेदवारांनी ही निवडणूक चांगलीच प्रतिष्ठेची केली होती. विकासाच्या मुद्द्यावर ही निवडणूक पूर्ण तालुक्यात गाजली. कामानिमित्त बाहेर असलेले मतदारही या निवडणुकीत मतदानासाठी गावी आले. एकंदरीत चार प्रभागातील ११ जागांसाठी ही निवडणूक प्रक्रिया पार पडली. कोरोनाच्या पार्श्वभूमीवर मतदारांनी तोंडाला मास्क लावून आणि सामाजिक अंतर ठेवून मतदान केले. सोमवारी (दि. १८) निकाल जाहीर होणार असून, दोन्ही पॅनलच्या उमेदवारांनी विजयाचा दावा केला आहे.

फोटो : १५ रुईछत्तीसी

रुईछत्तीसी येथे ग्रामपंचायत निवडणुकीच्या मतदानासाठी लागलेली मतदारांची रांग.