देवळाली प्रवरातील कोविड सेंटर खासगी का?

देवळाली प्रवरा येथील नगरपालिका इमारतीमध्ये सुरू असलेले खासगी कोविड सेंटर शासकीय करावे किंवा नागरिकांना मोफत सुविधा देण्यासाठी नगरपालिकेने स्वतः ते कोविड सेंटर चालवावे. अन्यथा नगरपालिकेच्या गेटसमोर आमरण उपोषण करणार असल्याचे आंतरराष्ट्रीय खेळाडू आप्पासाहेब ढुस यांनी अहमदनगरचे जिल्हाधिकारी डॉ. राजेंद्र भोसले यांना पाठविलेल्या निवेदनात म्हटले आहे.

इमारत नगरपालिकेची, पाणी नगरपालिकेचे, वीज नगरपालिकेची, सफाई कामगार नगरपालिकेचे ... मग कोविड सेंटरच खासगी का? असा देवळाली प्रवराच्या नागरिकांना प्रश्न पडला आहे. नगरपालिकेच्या मालमत्तेमध्ये खासगी कोविड सेंटर चालवून रुग्णाला भरमसाठ बिलाची आकारणी कशी काय करू शकता? असा सवाल आप्पासाहेब ढुस यांनी विचारून तात्काळ हे कोविड सेंटर शासकीय करा नाहीतर चले जाव आंदोलन छेडावे लागेल, असा इशारा दिला होता.

चार दिवसाचे चाळीस हजार रुपये बिल भरायला पैसे नसल्याने खासगी कोविड सेंटरमध्ये अडकून पडलेल्या देवळाली प्रवरा येथील रुग्णाला सोडवायला आंदोलन करायची वेळ आल्याने ढुस यांनी अहमदनगरचे जिल्हाधिकारी यांना आमरण उपोषणाचे निवेदन दिले आहे. कोरोनाची तिसरी लाट येण्यापूर्वी या खासगी कोविड सेंटरमध्ये आणखी काही बेड वाढवून त्याचे शासकीय मोफत कोविड सेंटरमध्ये रूपांतर करावे किंवा नगरपालिकेने ते स्वतः चालवावे या बाबत आम्ही नगरपालिकेला वारंवार विनंती केली आहे. त्यावरही नगरपालिकेने अद्यापपावेतो कोणताही निर्णय घेतला नाही.

...........

या खासगी कोविड सेंटरची नगरपालिकेकडून माहिती मिळावी

या कोविड सेंटरमध्ये आणखी काही बेड वाढवून ते शासकीय कोविड सेंटर करावे किंवा नगर परिषदेने ते कोविड सेंटर स्वतः चालविण्यासाठी आवश्यक ती उपाययोजना करावी. येथील नागरिकांना मोफत सेवा उपलब्ध करून कोरोनाची तिसरी लाट येण्यापूर्वी देवळाली प्रवरा परिसरातील नागरिकांना करावे. आमच्या मागण्या मान्य होईपर्यंत देवळाली प्रवरा नगरपालिकेच्या गेटसमोर आम्ही आमरण उपोषण करणार आहोत असे निवेदनात आप्पासाहेब ढुस यांनी म्हटले आहे. निवेदनाची प्रत राज्याचे मुख्यमंत्री उद्धव ठाकरे, अहमदनगरचे जिल्हा पोलिस अधीक्षक, राहुरीचे तहसीलदार व देवळाली प्रवरा नगरपालिकेचे मुख्याधिकारी यांना पाठविण्यात आली आहे.