नगर तालुक्यात वादळी वाऱ्याचा तडाखा

पावसाचा अंदाज दिसल्यास कांदा झाकण्यासाठी शेतकऱ्यांची धांदल उडाली. कांदा लागवडीपासूनच या पिकांवर विविध रोगांचा प्रादुर्भाव होत आहे. कांदा काढणीला आला तरी वातावरण शेतकऱ्यांना साथ देत नाही. त्यातच वादळी वाऱ्यासह अवकाळी पावसाने रंग दाखवायला सुरुवात केल्याने शेतकऱ्यांची धांदल उडाली आहे. तालुक्यात सर्वच भागात कांदा काढणीचे काम सुरू आहे. काढलेला कांदा गोळा करून शेतातच ठेवलेला आहे. वादळी वारे व अवकाळी पावसाचा अंदाज दिसला की कांदा झाकण्यासाठी शेतकऱ्यांची धावपळ होताना दिसत आहे.

कांदा लागवडीसाठी शेतकऱ्यांनी मोठा खर्च केला आहे. लागवड झालेल्या कांदा रोपाला सततच्या पावसाने फटका बसल्याने शेतकऱ्यांना दुबार कांदा लागवड करावी लागली. महागडे कांदा बियाणे, मजुरी, खते आणि फवारणीसाठी महागडी औषधे यासाठी शेतकऱ्यांना मोठा खर्च करावा लागला आहे. कांदा विक्रीतून मोठे उत्पादन मिळेल, अशी आशा निर्माण झाली असतानाच अवकाळी पावसाने शेतकऱ्यांच्या आशेवर पाणी फिरविले आहे.

अवकाळी पावसामुळे काढणी केलेला कांदा शेतातच भिजत असल्याने शेतकऱ्यांना लाखो रुपयांचा

फटका बसणार आहे.

वादळी वाऱ्यासह होणाऱ्या अवकाळी पावसाने चारा पिकांचे नुकसान होत आहे. वादळी वाऱ्याने कडवळ, मका भुईसपाट होत आहे. तालुक्यात बहुतांशी भागात गव्हाचे खळे झाले आहे. गव्हाचा भुसा शेतातच पडलेला आहे.

............

कांदा लागवडीसाठी महागडे बी टाकून रोपे तयार केली. पण सततच्या पावसाने कांदा रोपे जागेवर सडली. त्यामुळे महागडी रोपे व बियाणे घेऊन कांदा लागवड केली. सुरुवातीपासून वातावरणात बदल होताना पिकांवर काढणीपर्यंत महागडी औषधे फवारणी करावी लागली. सध्या काढणी केलेल्या कांद्याला अवकाळी पावसाने तडाखा दिला आहे.

- तुकाराम लांडगे , शेतकरी, सारोळा बध्दी

फोटो केडगाव

: अवकाळी पावसामुळे काढणी झालेला कांदा झाकण्यासाठी शेतकरी धावपळ करीत आहेत.