शहर बँक अपहारातील आरोपी योगेश मालपाणी जेरबंद

नगर शहरात उभारण्यात आलेल्या एम्स हॉस्पिटलमध्ये मशिनिरी खरेदीसाठी डॉ. नीलेश शेळके याने बँकेच्या संचालक मंडळाशी संगनमत करून बनावट कागदपत्रांच्या आधारे परस्पर कर्ज मंजूर करून आर्थिक फसवणूक केली, अशा प्रकारची फिर्याद राहुरी येथील डॉ. रोहिणी भास्कर सिनारे, श्रीरामपूर येथील डॉ. उज्ज्वला रवींद्र कवडे व नगरमधील डॉ. विनोद अण्णासाहेब श्रीखंडे यांनी कोतवाली पोलीस ठाण्यात सप्टेंबर २०१८ मध्ये दाखल केली होती. या तिघांची प्रत्येकी ५ कोटी ७५ लाख रुपयांची फसवणूक झाली होती. त्यानुसार डॉ. शळके याच्यासह बँकेचे संचालक मंडळ, अधिकारी व मशिनरी वितरक योगेश मालपाणी आदींविरोधात तीन स्वतंत्र गुन्हे दाखल झाले होते. हे प्रकरण आर्थिक गुन्हे शाखेकडे वर्ग केल्यानंतर पोलीस उपअधीक्षक प्रांजल सोनवणे या प्रकरणाचा तपास करत आहेत. मालपाणी याच्याकडून हॉस्पिटलसाठी मशिनिरी घेतल्या जाणार होत्या. यासाठी बँकेने कर्ज मंजूर केल्यानंतर त्याला पैसे वर्ग करण्यात आले होते. मालपाणी याने मात्र मशिनरी न देता हे पैसे बनावट खात्यात वर्ग केल्याचे पोलीस तपासात समोर आले आहे. अपहारातील सहभाग समोर आल्याने पोलिसांनी मालपाणी याला बुधवारी नगर शहरातील त्याच्या राहत्या घरातून अटक केली.

-----------------------

फॉरेन्सिक ऑडिटचा अहवाल आठ दिवसांत

या गुन्ह्याचे दीड वर्षापासून फॉरेन्सिक ऑडिट सुरू आहे. येत्या आठवडाभरात हा अहवाल प्राप्त होणार असल्याचे तपासी अधिकारी सोनवणे यांनी सांगितले. या अहवालात अपहार कसा झाला आणि त्यात कुणाचा सहभाग होता हे स्पष्ट होणार असल्याने येत्या काही दिवसांत आणखी काही जणांना अटक होण्याची शक्यता आहे. दरम्यान, या गुन्ह्यात आधी अटक केलेला डॉ. नीलेश शेळके याच्याविरोधात मागील महिन्यात जिल्हा न्यायालयात तीन स्वतंत्र दोषारोपत्र दाखल करण्यात आलेले आहेत.