खडांबे येथे बँक लुटण्याचा प्रयत्न

राहुरी : तालुक्यातील खडांबे खुर्द येथे बुधवारी दुपारी कोटक महेंद्रा बँक लुटण्याचा प्रयत्न तीन चोरट्यांनी केला़ कॅशिअरच्या तोंडावर स्प्रे मारून रक्कम लुटण्यात आली़ पळून गेलेल्या चोरट्यांचा पाठलाग गावकऱ्यांनी केला व एकास पकडून पोलिसांच्या स्वाधीन केले़ अन्य दोघे फरार झाले आहेत़ अटक केलेल्या चोरट्याकडून लुटीची रक्कम हस्तगत करण्यात आली आहे़ राहुरी तालुक्यातील खडांबे येथे तीन वर्षापूर्वी कोटक महेंद्र्रा बँकेची शाखा सुरू करण्यात आली़ बुधवारी १० आॅगस्ट रोजी दुपारी दोनच्या सुमारास विना क्रमांकाच्या पल्सर मोटारसायकलवरून तीन जण बँकेसमोर आले़ त्यातील एक जण बँकेत गेला, अन्य दोघे रस्त्यावर थांबले़ बँकेत गेलेल्याने ‘तुम्ही मुलींची छेडछाड करता’ असा आरोप करीत शाखा व्यवस्थापक निखील भुतडा व कॅशिअर संतोष निकम यांच्या दिशेने मिरचीचा स्पे्र फवारला़ एक हजार व पाचशेच्या नोटा घेऊन चोरटा पळत असतांना कॅशिअर निकम यांनी त्याला आवळले़, मात्र तो हिसका देवून रोख रक्कम घेवून पळाला़ व्यवस्थापक निखील भुतडा यांनी चोरट्याचा पाठलाग केला़ त्यानंतर जवळच असलेल्या गिन्नी गावात दीपक पवार यांच्या शेतात चोरटा लपला़ माजी सरपंच बाळासाहेब लटके, अशोक शेळके, सुयोग पवार, सोमनाथ गायकवाड, अमृत शेळके, कान्हु ताकटे, पोलीस पाटील जयसिंग पवार यांनी पाठलाग करून चोरट्याला पकडले़ पोलीस तुपे हे राहुरीवरून वांबोरीकडे जात होते़ त्यांना घटनेची माहिती मिळताच पोलीस कर्मचारी कुटे, मिसाळ यांना घटनेची माहिती देऊन बोलावून घेतले़ पोलीस निरीक्षक प्रमोद वाघ यांनी घटनास्थळी जाऊन चौकशी केली व एका चोरट्यास ताब्यात घेतले़ अन्य दोघे पळून जाण्यात यशस्वी झाले़ बँक लूट प्रकरणात अटक करण्यात आलेल्या चोरट्याचे नाव किरण दुशिंग आहे़ त्याला जबरी चोरीच्या गुन्ह्यात पुणे पोलिसांनी पकडले होते़ काही दिवसांपूर्वी तो सुटला़ त्याच्याकडून लुटीची ५४ हजार रुपयांची रक्कम हस्तगत करण्यात आली असल्याची माहिती, पोलीस निरीक्षक प्रमोद वाघ यांनी दिली़ अन्य दोन आरोपींचा शोध सुरू असल्याचेही ते म्हणाले़