व्यावसायिकाची दुचाकी अडवून १ लाख ४५ हजार रुपयांची रोकड लंपास;मुर्तीजापूर येथील घटना

अज्ञात युवकांविरुद्ध गुन्हा दाखल

मुर्तीजापूर (जि. अकोला) : जुनी वस्ती भगतसिंग चौक आठवडी बाजार रोडवर असलेल्या गुप्ता वाईन शॉप चे मालक राजेश गुप्ता हे मंगळवार, ७ मेंच्या रात्री आपले दुकान बंद करून घरी जात असताना २० ते २५ वयोगटातील चार अज्ञात युवकांनी जिल्हा परिषद शाळेजवळ रात्री १ वाजताच्या सुमारास त्यांची दुचाकी अडवून काठीने मारहाण करून त्यांच्या जवळची १ लाख ४५ हजार रूपयांची रोख रक्कम असलेली बॅग लंपास केली.

गुप्ता वाईन शॉप चे मालक राजेश गुप्ता (४४, रा. शिवाजी नगर) यांनी शहर पोलिस ठाण्यात दिलेल्या तक्रारीनुसार, ते मंगळवार, ७ मे च्या रात्री १ वाजताचे सुमारास आपले दुकान बंद करून दुकानातील रोख १ लाख २३ हजार ५०० रूपये बॅगेत ठेवली. बाजुलाच असलेल्या आपल्या मोठ्या भावाच्या सारीका वाईन बार दुकानातून दिलेले २१ हजार ५०० रुपये त्याच बॅगेत ठेवून ते आपल्या माणसासोबत दुचाकीने घरी जायला निघाले.

जिल्हा परिषद शाळेजवळ अंधाराचा फायदा घेऊन मागून आलेल्या अज्ञात दुचाकीस्वारांनी आवाज देऊन थांबविले. जवळ आल्यानंतर अज्ञात दुचाकीस्वारांनी गुप्ता यांना लाथ मारून खाली पाडले व काठीने मारहाण करून जखमी करीत त्यांच्याजवळ असलेली १ लाख ४५ हजार रूपयांची बॅग हिसकावून पळ काढला.या फिर्यादी वरून पोलिसांनी चार अज्ञात युवकांविरूद्ध कलम ३९४, ३४ अन्वये गुन्हा दाखल केला. पुढील तपास ठाणेदार भाऊराव घुगे यांच्या मार्गदर्शनाखाली सहायक पोलिस निरीक्षक वडतकर करीत आहेत.