आझाद हिंद एक्स्प्रेसच्या ६, तर ज्ञानेश्वरी एक्स्प्रेसच्या ४ फेऱ्या रद्द

बिलासपूर विभागात २४ ते ३० जूनपर्यंत ब्लॉक, सहा रेल्वे परिवर्तीत मार्गाने धावणार

अकोला : दक्षीण पूर्व मध्य रेल्वेच्या बिलासपूर विभागातील कोतरलिया रेल्वे स्थानकाजवळ २४ ते ३० जून दरम्यान प्री-नॉन इंटरलॉकिंग आणि नॉन इंटरलॉकिंगचे काम केले जाणार आहे. या तांत्रिक कामाकरिता विविध तारखांना १६ एक्स्प्रेस गाड्या रद्द करण्यात आल्या आहेत, तर ६ एक्स्प्रेसच्या मार्गात बदल करण्यात आला आहे. यामध्ये अकोला मार्गे धावणाऱ्या आझाद हिंद व ज्ञानेश्वरी एक्स्प्रेसच्या अनुक्रमे ६ व ४ फेऱ्या रद्द करण्यात आल्याने अकोलेकर प्रवाशांना अडचणींचा सामना करावा लागणार आहे.

रेल्वेतील सूत्रांकडून प्राप्त माहितीनुसार, १२१३० हावडा-पुणे आझाद हिंद एक्स्प्रेस २५ ते ३० जूनपर्यंत प्रस्थान स्थानकावरून रद्द करण्यात आली आहे. १२१२९ पुणे-हावडा आझाद हिंद एक्स्प्रेस २७ जून ते २ जुलै या कालावधीत प्रस्थान स्थानकावरून रद्द करण्यात आली आहे. १२१०१ एलटीटी-शालिमार ज्ञानेश्वरी एक्स्प्रेस २४, २५, २८ आणि २९ जून रोजी, तर १२१०२ शालिमार-एलटीटी ज्ञानेश्वरी एक्स्प्रेस २६, २७, ३० जून आणि १ जुलै रोजी त्यांच्या प्रस्थान स्थानकावरूनच रद्द करण्यात आल्या आहेत. २०८२२ संत्रागाछी-पुणे हमसफर एक्स्प्रेस २९ जून रोजी, तर २०८२१ पुणे-संत्रागाछी हमसफर एक्स्प्रेस १ जुलै रोजी रद्द करण्यात आल्या आहेत. तथापी, या रेल्वेला अकोला स्थानकावर थांबा नसल्याने अकोलेकरांना त्याचा परिणाम जाणवणार नाही.