‘फिट इंडिया’त जिल्ह्यातील ७५५ शाळा ‘अनफिट’!

अकोला : फिट इंडिया मोहिमेंतर्गत वाशिमसह राज्यातील सर्व माध्यमांच्या सर्व व्यवस्थापनाच्या इयत्ता पहिली ते बारावीच्या शाळांची नोंदणी ऑनलाइन पद्धतीने केली जात आहे. आतापर्यंत जिल्ह्यातून ५९.५० टक्के शाळांची नोंदणी झाली असून, ७५५ शाळांची नोंदणी होणे बाकी आहे. शाळांकडून नोंदणी करण्याचे काम सुरू असून, नोंदणी करताना तांत्रिक अडचणी येत असल्याने शिक्षक वैतागले आहेत.

मुलांना शारीरिकदृष्ट्या तंदुरुस्त ठेवण्यासाठी केंद्र शासनाने फिट इंडिया ही मोहीम हाती घेतली आहे. शारीरिक सृदृढतेचे महत्त्व विद्यार्थ्यांना पटवून त्याबद्दल जागृती निर्माण करणे, शारीरिक क्षमता मूल्यमापन चाचण्या या शाळा स्तरावर घेऊन विद्यार्थ्यांची मूल्यमापनविषयक माहिती संकेतस्थळावर किंवा मोबाइल अ‍ॅपद्वारे भरण्यात यावी, आदी उद्देश यशस्वी व्हावे, याकरिता फिट इंडिया मोहिमेंतर्गत सर्व माध्यमांच्या सर्व व्यवस्थापनाच्या इयत्ता पहिली ते बारावीच्या शाळांची नोंदणी शासनाच्या संकेतस्थळावर करण्यात येत आहे. तसेच खेलो इंडियाच्या अ‍ॅपवर पहिली ते बारावीच्या सर्व शाळांमधील शारीरिक शिक्षण विषयाच्या एका शिक्षकाला नोंदणी करणे आवश्यक आहे. शाळेत शारीरिक शिक्षण या विषयाचे शिक्षक उपलब्ध नसल्यास संबंधित मुख्याध्यापक किंवा प्राचार्यांनी या कामासाठी एका सहायक शिक्षकाची नियुक्ती करावी, अशा सूचना राज्य शैक्षणिक संशोधन व प्रशिक्षण परिषद महाराष्ट्राचे संचालक राहुल द्विवेदी यांनी दिलेल्या आहेत. जिल्ह्यात नोंदणी केलेल्या शारीरिक शिक्षकांची संख्या फार कमी असून, २८ डिसेंबर २०२० ही अंतिम मुदत आहे. दुसरीकडे शाळांची नोंदणी करण्यासाठी २७ डिसेंबर अशी अंतिम मुदत आहे. आतापर्यंत १८६४ पैकी ११०९ शाळांची नोंदणी झाली असून, ७५५ शाळांची नोंदणी अद्याप बाकी आहे.

नोंदणी करण्यासाठी येतात तांत्रिक अडचणी

नोंदणी करण्यासाठी शिक्षण व क्रीडा विभागाने सर्व मुख्याध्यापकांना सूचना दिलेल्या आहेत; याशिवाय सोशल मीडियाच्या माध्यमातून संबंधित ‘लिंक’ पाठविण्यात आली; परंतु लिंक ओपन होत नसल्याच्या तक्रारी अनेक शाळा व शिक्षकांनी केल्या. नोंदणीत तांत्रिक अडचणी येत आहेत.

फिट इंडिया मोहिमेंतर्गत शाळा व शारीरिक शिक्षकांनी नोंदणी करण्यासंदर्भात जिल्ह्यात कार्यवाही सुरू आहे. जिल्ह्यातील शाळा नोंदणी करीत असून, दिवसेंदिवस संख्या वाढत आहे.

- दिनकर उजाडे,

जिल्हा क्रीडा अधिकारी.