मतदार यादीत नाव नोंदणीसाठी ८०७ अर्ज!

अकोला: मतदार याद्यांचा दुसरा विशेष संक्षिप्त पुनरीक्षण कार्यक्रमांतर्गत जिल्ह्यात मतदार यादीत नावे नोंदणीसाठी २०, २१, २७ व २८ जुलै असे चार दिवस विशेष मोहीम राबविण्यात येत आहे. या विशेष मोहिमेच्या तिसऱ्या दिवशी शनिवार, २७ जुलै रोजी जिल्ह्यात मतदार यादीत नावे समाविष्ट करण्यासाठी ८०७ नवमतदारांनी मतदान केंद्रस्तरीय अधिकाऱ्यांकडे (बीएलओ) अर्ज सादर केले.
गत १ जानेवारी २०१९ या अर्हता दिनांकावर आधारित मतदार याद्यांचा विशेष पुनरीक्षण कार्यक्रम अंतर्गत ज्या मतदारांची मतदार यादीत नोंदणी झाली नाही, अशा मतदारांची नावे मतदार यादीत समाविष्ट करण्यासाठी मतदार याद्यांचा दुसरा विशेष संक्षिप्त पुनरीक्षण कार्यक्रम राबविण्यात येत आहे. त्यानुसार जिल्ह्यात २०, २१, २७ व २८ जुलै असे चार दिवस मतदार नोंदणीची विशेष मोहीम राबविण्यात येत आहे. त्यामध्ये शनिवार २७ जुलै रोजी जिल्ह्यातील १ हजार ६८० मतदान केंद्रांवर राबविण्यात आलेल्या विशेष मोहिमेत मतदार यादीत नवीन मतदारांची नावे समाविष्ट करणे, मतदार यादीतील दुबार, स्थलांतरित व मयत मतदारांची नावे वगळणे, नावात दुरुस्ती व पत्त्यात दुरुस्ती संदर्भात मतदारांकडून अर्ज स्वीकारण्यात आले. जिल्ह्यातील अकोट, बाळापूर, अकोला पश्चिम, अकोला पूर्व व मूर्तिजापूर या पाच विधानसभा मतदारसंघांत मतदार यादीत नावे नोंदणीसाठी ८०७ नवमतदारांनी मतदान केंद्रस्तरीय अधिकाºयांकडे अर्ज सादर केले. रविवार, २८ जुलै रोजीदेखील जिल्ह्यातील मतदान केंद्रांवर मतदार नोंदणीची विशेष मोहीम राबविण्यात येणार आहे.