हातगावजवळ अपघात; दुचाकीस्वार ठार

मूर्तिजापूर : कारंजा मार्गावर असलेल्या हातगाव येथील कमळगंगा नदीच्या पुलावर ७ जुलै रोजी सकाळी ९ वाजताच्या सुमारास झालेल्या भीषण अपघातात दुचाकीस्वार युवकाचा जागीच मृत्यू झाल्याची घटना घडली.

लोकमत न्यूज नेटवर्क
मूर्तिजापूर : कारंजा मार्गावर असलेल्या हातगाव येथील कमळगंगा नदीच्या पुलावर ७ जुलै रोजी सकाळी ९ वाजताच्या सुमारास झालेल्या भीषण अपघातात दुचाकीस्वार युवकाचा जागीच मृत्यू झाल्याची घटना घडली.
मूर्तिजापूर-कारंजा मार्गावर असलेल्या हातगाव गावाजवळील कमळगंगा नदीच्या पुलावर कारंजाकडे जात असलेल्या दुचाकीला अज्ञात वाहनाने जोरदार धडक दिल्याची घटना सकाळी ९ वाजताच्या सुमारास घडली.
अपघात एवढा भीषण होता की मोटारसायकलच्या समोरील भागाचा पूर्ण चुराडा झाला तर मोटारसयकलस्वार जबर मार लागल्याने जागीच ठार झाला. कोणला काही कळायच्या आत अज्ञात वाहनाने पोबारा केला. सदर घटनेचे वृत्त कळताच पोलिसांनीदेखील घटनास्थळ गाठले. त्यानंतर मृतकाची ओळख पटली. सदर मृतक हा पंकज रामदास बोर्डे (३०) रा. पळसो बढे ता. जि. अकोला असल्याचे निष्पन्न झाले. सदर युवक हा लाडेगाव येथे लग्नानिमित्त वरात पंगतीच्या समारंभासाठी एम.एच. ३० एक्यू ८६५४ क्रमांकाच्या स्प्लेंडर दुचाकीने जात असताना हातगाव जवळील पुलावर भरधाव अज्ञात ट्रकने त्यास जोरदार धडक दिली. सदर अज्ञात वाहन चालकाविरुद्ध मूर्तिजापूर पोलीस स्टेशनला कलम २९७, १०४ अ भादंवि नुसार गुन्हा दाखल करण्यात आला असून पुढील तपास पोलीस उपनिरीक्षक अश्विनी गायकवाड करीत आहेत.