टाटा ४०७ ला अपघात; ९ जखमी, ४ गंभीर

कुत्रा आडवा आल्याने व्याळानजीक घडली घटना

अकोला - व्याळा ते कान्हेरी मार्गावर धरणावरून काम करून टाटा ४०७ मध्ये परत जाणार्‍या मजुरांच्या मिनी ट्रकला कुत्रा आडवा गेल्याने गुरुवारी सकाळी अपघात झाला. या अपघातामध्ये ९ मजूर जखमी झाले असून, त्यापैकी ४ जणांची प्रकृती चिंताजनक आहे. त्यांच्यावर शासकीय वैद्यकीय महाविद्यालय तथा सर्वोपचार रुग्णालयात उपचार सुरू आहेत.
एमएच ०४ सीए ३५७२ क्रमांकाच्या टाटा ४०७ मध्ये उमरेड तालुक्यातील शिवापूर येथील धरणावरील काम करणारे मजूर भोकर तालुक्यातील हसनाबाद येथे आपल्या परिवारासह गावी जात होते. कान्हेरीगवळी ते व्याळा मार्गावरून जात असताना त्यांच्या मिनी ट्रकसमोरून अचानक कुत्रा आडवा गेला. त्यामुळे टाटा ४०७ च्या चालकाचे वाहनावरील नियंत्रण सुटल्याने या मिनी ट्रकला अपघात झाला. जखमींमध्ये २ छोटी बालकं, तीन मुलांसह ९ जणांचा समावेश आहे. या अपघातामध्ये बबन श्रीनागे (२१), कांताबाई श्रीनागे, सुनीता बनसोडे, उमाजी बनसोडे, सचिन बायने, मनू बायने, प्रवीण बनसोडे, दिनेश बनसोडे व भाग्यश्री बनसोडे हे जखमी झाले. यामधील चार जणांची प्रकृती गंभीर असून, त्यांच्यावर सर्वोपचार रुग्णालयात उपचार सुरू आहेत.