तडीपारीच्या आदेशाचे उल्लंघन करणारा आरोपी जेरबंद

शहर पोलीस उपअधीक्षकाच्या पथकाची कारवाई

अकोला : सिटी कोतवाली पोलीस ठाण्याच्या हद्दीतील लोहा बाजार येथील रहिवासी एका कुख्यात आरोपीस जिल्ह्यातून तडीपार केल्यानंतरही तो बेकायदेशीररित्या वास्तव्य करीत असल्याच्या माहितीवरून शहर पोलीस उपअधीक्षक सचिन कदम यांच्या विशेष पथकाने आरोपीस शनिवारी अटक केली. त्याच्याविरुद्ध सिटी कोतवाली पोलीस ठाण्यात गुन्हा दाखल करण्यात आला आहे.

लोहा बाजार येथील रहिवासी आरोपी पवन ऊर्फ टकल्या विलास मोरे (वय २५ वर्ष) हा अनेक गुन्ह्यात सहभागी असल्याने त्याला जिल्ह्यातून तडीपार करण्यात आले होते; मात्र त्यानंतरही तो शहरात बेकायदेशीररित्या वास्तव्य करीत असल्याची माहिती पोलीस उपअधीक्षक सचिन कदम यांच्या विशेष पथकाला मिळाली. या माहितीवरून त्यांच्या विशेष पथकाने शनिवारी त्याच्या घराची झडती घेऊन आरोपीस ताब्यात घेतले. आरोपीविरुद्ध सिटी कोतवाली पोलीस ठाण्यात मुंबई पोलीस कायद्याच्या कलम १४२ नुसार गुन्हा दाखल करण्यात आला आहे. ही कारवाई शहर पोलीस उपअधीक्षक सचिन कदम यांच्या विशेष पथकाने केली.