मुंडगाव येथे गुटखा विक्रेत्याविरुद्ध कारवाई

दहीहांडा येथे क्रिकेट स्पर्धेचा समारोप

दहीहांडा : वसीम काझी मित्रपरिवाराच्या वतीने क्रिकेट स्पर्धेचे आयोजन करण्यात आले होते. कोरोनाच्या प्रादुर्भावामुळे क्रिकेट स्पर्धेचा नुकताच समारोप करण्यात आला. कार्यक्रमाला प्यारेलाल जयस्वाल, अजिम, सुनील पोटे, दिलीप जामनेकर, प्रा. विजय आठवले, गोविंद गोयनका, दिनकर अस्वार आदी उपस्थित होते.

शेत रस्त्याची दुरवस्था, दुरुस्तीची मागणी

कुरूम/माना : कुरूम परिसरातील शेत रस्त्यांची दुरवस्था झाली असून, शेतकऱ्यांना शेतातून माल आणण्यासाठी कसरत करावी लागते. पावसाळ्याच्या दिवसांमध्ये तर शेतकऱ्यांना शेतातून माल आणताना त्रास सहन करावा लागतो. त्यामुळे शेत रस्त्यांची दुरुस्ती करण्याची मागणी शेतकऱ्यांनी केली आहे.

चोहोट्टा-दापुरा फाट्यापर्यंतच्या रस्त्याची दुरवस्था

चोहोट्टा बाजार : चोहोट्टा बाजार-दापुरा फाट्यापर्यंतच्या रस्त्याची दुरवस्था झाली आहे. रस्त्यावर ठिकठिकाणी खड्डे पडले आहेत. त्यामुळे वाहनचालकांना त्रास सहन करावा लागत आहे. दोन वर्षांपूर्वी मुख्यमंत्री सडक योजनेतून रस्त्याचे डांबरीकरण करण्यात आले होते. रस्ता दुरुस्तीची मागणी परिसरातील नागरिकांनी केली आहे.

महावितरणची वसुली थांबविण्याची मागणी

आलेगाव : महावितरण कंपनीकडून आलेगावात दाखल होऊन सक्तीने वीजबिलांची वसुली करीत आहेत. बिल भरले नाही तर वीज खंडित करण्याची धमकी देण्यात येत आहे. शासन वीजबिल माफ करेल, या आशेने अनेकांनी बिलांचा भरणा केला नाही. महावितरणची वसुली थांबविण्याची मागणी होत आहे.

बोरगाव मंजू येथे कोरोना नियमांकडे दुर्लक्ष

बोरगाव मंजू : बोरगाव मंजू गावामध्ये सुरुवातीला अनेकांना कोरोनाची बाधा झाली होती; परंतु नंतर स्थिती पूर्वपदावर आली. त्यामुळे नागरिक, व्यावसायिक बेफिकीर झाले आहेत. बाजारात बिनधास्त वावरताना दिसत आहेत. त्यामुळे कोरोना प्रादुर्भाव वाढण्याची शक्यता आहे. पोलिसांनी कारवाई करावी, अशी मागणी होत आहे.

तेल्हारा-कोठा रस्त्याची दैन्यावस्था

तेल्हारा : तेल्हारा-कोठा रस्त्याची दुरवस्था झाली आहे. पाच वर्षांपूर्वी पंतप्रधान ग्रामसडक योजनेतून रस्त्याचे डांबरीकरण झाले होते; परंतु सद्य:स्थितीत रस्ता पूर्णत: उखडला आहे. रस्त्यावरील खड्ड्यांमुळे वाहनचालकांना कसरत करावी लागत आहे. रस्त्याची तातडीने दुरुस्ती करण्याची मागणी ग्रामस्थांनी केली आहे.

गुरांच्या पिण्याचा पाण्याचा प्रश्न गंभीर

चान्नी : येथून जवळ असलेल्या चतारी येथे ग्रामपंचायतच्या पाणीपुरवठा योजनेच्या हौदात पाणी नसल्यामुळे गुरांच्या पिण्याचा पाण्याचा प्रश्न निर्माण झाला आहे. गावात पाणी नसल्यामुळे गुरांना शेतातील पाण तलावांवर न्यावे लागत आहे.

पेव्हर ब्लॉकच्या कामास सुरुवात

हिवरखेड : मेनरोडवरील बसस्थानकापासून पेव्हर ब्लॉक बसविण्याच्या कामास सुरुवात झाली आहे. अनेक दिवसांपासून पेव्हर ब्लॉक बसविण्याचे काम प्रलंबित होते. रस्त्यालगतच पेव्हर ब्लॉक बसविण्याच्या कामाला सुरुवात झाल्याने नागरिकांनी समाधान व्यक्त केले.