अकोल्यात ५६ टक्के मतदान

अकोला महानगरपालिकेच्या ८0 जागांसाठी मंगळवारी निवडणूक पार पडली.

अकोला, दि. २१-अकोला महानगरपालिकेच्या ८0 जागांसाठी मंगळवारी पार पडलेल्या निवडणुकीत ५५.९१ टक्के मतदान झाले. किरकोळ घटनांचा अपवाद वगळता शहरातील ५८७ मतदान केंद्रांवर शांततेत मतदान पार पडले. २0 प्रभागातील ८0 जागांसाठी निवडणूक रिंगणात असलेल्या ५७९ उमेदवारांचे भवितव्य मतदान यंत्रात बंद झाले.
मनपा प्रशासनाने निवडणुकीसाठी जय्यत तयारी केली होती. सकाळपासूनच नागरिकांनी मतदान केंद्रांवर गर्दी केली होती. दुपारी मतदानाचा वेग मंदावल्यानंतर सायंकाळी शेवटच्या दोन तासांत मतदारांनी मतदान केंद्रांवर मोठी गर्दी केली होती. निवडणुकीसाठी पोलिसांनी चोख बंदोबस्त ठेवला होता. मतदान यंत्रात बिघाड व किरकोळ वाद यासारख्या घटनांचा अपवाद वगळता सर्वच मतदान केंद्रांवर शांततेत मतदान पार पडले.