अकोला पंचायत समिती सभापतीपदाचा प्रभार जिल्हा परिषद कृषी सभापतींकडे!

अकोला : सर्वोच्च न्यायालयाच्या निकालानुसार नागरिकांचा मागासवर्ग प्रवर्गातून (ओबीसी) निवडून आलेले अकोला पंचायत समितीचे सभापती वसंतराव नागे यांचे सदस्यत्व रद्द झाल्याने, रिक्त झालेल्या अकोला पंचायत समिती सभापतीपदाचा प्रभार जिल्हा परिषदेचे कृषी व पशुसंवर्धन सभापती पंजाबराव वडाळ यांच्याकडे सोपविण्यात येत असल्याचा आदेश जिल्हा परिषद मुख्य कार्यकारी अधिकारी (सीइओ) सौरभ कटियार यांनी शुक्रवार, १२ मार्च रोजी दिला.

गतवर्षी जानेवारी महिन्यात घेण्यात आलेल्या जिल्हा परिषद व जिल्ह्यातील पंचायत समित्यांच्या सार्वत्रिक निवडणुकीमध्ये देण्यात आलेले प्रवर्गनिहाय आरक्षण ५० टक्क्यापेक्षा जास्त झाल्याने, नागरिकांचा मागासवर्ग प्रवर्गातून (ओबीसी) निवडून आलेल्या सदस्यांचे सदस्यत्व रद्द करुन, पुन्हा निवडणूक घेण्याचा आदेश सर्वोच्च न्यायालयाने ४ मार्च रोजी दिला. त्यानुसार अकोला जिल्हा परिषदेच्या ‘ओबीसी’ प्रवर्गातील १४ सदस्यांचे आणि सहा पंचायत समित्यांच्या २४ सदस्यांचे सदस्यत्व रद्द करण्यात आले आहे. त्यामध्ये जिल्हा परिषदेचे शिक्षण व बांधकाम सभापती चंद्रशेखर पांडे गुरुजी, महिला व बालकल्याण सभापती मनीषा बोर्डे तसेच अकोला पंचायत समितीचे सभापती वसंतराव नागे यांचे सदस्यत्व रद्द झाले आहे. सदस्यत्व रद्द झाल्याने रिक्त झालेल्या शिक्षण व बांधकाम आणि महिला व बालकल्याण या दोन सभापतीपदांचा प्रभार जिल्हा परिषद अध्यक्ष प्रतिभा भोजने यांच्याकडे सोपविण्यात आहे. त्यानंतर अकोला पंचायत समितीच्या रिक्त झालेल्या सभापतीपदाचा प्रभार जिल्हा परिषदेचे कृषी व पशुसंवर्धन सभापती पंजाबराव वडाळ यांच्याकडे सोपविण्यात येत असल्याचा आदेश जिल्हा परिषदेचे मुख्य कार्यकारी अधिकारी सौरभ कटियार यांनी दिला. त्यानुसार अकोला पंचायत समिती सभापतीपदाची निवडणूक होइपर्यंत सभापतीपदाचा पदभार जिल्हा परिषदेचे कृषी व पशुसंवर्धन सभापती पंजाबराव वडाळ सांभाळणार आहेत.

कृषी सभापती सोमवारी

स्वीकारणार प्रभार!

जिल्हा परिषद मुख्य कार्यकारी अधिकाऱ्यांकडून प्राप्त झालेल्या पत्रानुसार सोमवार, १५ मार्च रोजी अकोला पंचायत समिती सभापतीपदाचा प्रभार स्वीकारणार आहे, असे जिल्हा परिषदेचे कृषी व पशुसंवर्धन सभापती पंजाबराव वडाळ यांनी सांगितले.