जोडीदार ऑनलाइन शोधताना सावधान, हात पिवळे होण्याआधीच होऊ शकतो खिसा रिकामा

अकाेला : ऑनलाइन फसवणुकीच्या घटनांमध्ये गेल्या अनेक दिवसांपासून मोठी वाढ झाली आहे. विवाह बंध जोडून देणाऱ्या ऑनलाइन वेबसाइटलाही निशाणा बनविले जात आहे. जर तुम्हीदेखील अशा यूजर्सपैकी असाल जे जोडीदार शोधण्यासाठी आणि लग्नासाठी मॅट्रीमोनिअल वेबसाइट्सचा वापर करतात, तर सावधा राहा. कारण, वर-किंवा वधू दाखविण्याच्या उद्देशाने तुमची लाखोंची फसवणूक होऊ शकते. जाेडीदार आयुष्यात येण्याआधी तुमचा खिसा ऑनलाइन हॅकर्सकडून रिकामा करण्यात येत असल्याच्या घटना घडत आहेत.

मॅट्रीमोनिअल वेबसाइट्सचा जर तुम्ही वर किंवा वधू शोधण्यासाठी वापर करीत असाल तर आजच तुम्हाला सावध होण्याची गरज आहे. कारण, या साइटसचा मोठ्या प्रमाणात सुळसुळाट झाला असून, अनेकांची फसवणूकही होत आहे. आतापर्यंत जिल्ह्यात असे दाेन प्रकार घडले असून, प्रत्यक्ष मुलगी दाखवूनही लूटमार झाल्याच्या घटना अकाेल्यातील डाबकी राेड, जुने शहर व पातूर पाेलीस ठाण्याच्या हद्दीत घडलेल्या आहेत. यामध्ये केवळ मुलांचीच नाही तर मुलींचीही फसवणूक होत असल्याने दोन्हीकडील मंडळींनी सावध होण्याची वेळ आली आहे.

..ही घ्या काळजी

मॅट्रीमोनिअल वेबसाइट्सवर रजिस्टर करण्यासाठी नवीन ई-मेल आयडीचा वापर करावा. यासोबतच मॅट्रीमोनिअल वेबसाइट्सवर फोटो, फोन नंबर आणि पत्ता यासारख्या खासगी गोष्टी शेअर करण्यासदेखील मनाई करण्यात आली आहे. सरकारने यूजर्सला सूचना दिली आहे की, कोणत्याही मॅट्रीमोनिअल वेबसाइट्सवर रजिस्ट्रेशन करण्याआधी त्याविषयी संपूर्ण माहिती जाणून घ्या. यासाठी वेबसाइटचे रिव्ह्यूज वाचावे आणि कोणत्याही वेबसाइटवर विश्वास ठेवण्याआधी मित्र आणि कुटुंबाचा सल्ला नक्की घ्या, अशा प्रकारची काळजी घेण्याचे आवाहन पाेलिसांनी केले आहे.

..अशी होते फसवणूक

मॅट्रीमोनिअल वेबसाइट्सद्वारे फ्रॉड करणारे कोणतीही इमर्जन्सी असल्याचे सांगून पैसे खात्यात टाकण्यास सांगतात. तसेच गिफ्ट पाठवले असून, त्यासाठी टॅक्स मनी ट्रान्स्फर करण्यास सांगून फसवणूक करतात तर वर आणि वधूचे फोटो जे की खोटे असतात, त्यांचा पत्ता, संपर्क क्रमांक याचा कुठलाही ताळमेळ नसतो अशांची माहिती पुरवून तुमची फसवणूक केली जाते.

कोणतीही लिंक डाऊनलोड अथवा फाॅरवर्ड करण्याआधी विचार करा, अधिकृत साइटलाच भेट द्या, पैशाचे व्यवहार करताना त्या व्यक्तीला प्रत्यक्ष भेटा, विवाहासंबंधी गोष्टीमध्ये मध्यस्थी व्यक्तीवर विश्वास ठेवल्यापेक्षा प्रत्यक्ष स्थळाला भेट द्या.

- सचिन कदम

शहर पाेलीस उपअधीक्षक, अकाेला