कार-दुचाकीची समोरासमोर धडक; एक ठार

बार्शीटाकळी-पिंजर रोडवरील घटना

बार्शीटाकळी: तालुक्यातील बार्शीटाकळी ते पिंजर रोडवर कार व दुचाकीची समोरासमोर धडक झाली. या अपघातात दुचाकीस्वाराचा मृत्यू झाल्याची घटना रविवार, दि. १२ सप्टेंबर रोजी रात्रीच्या सुमारास घडली आहे. प्रभाकर ऊर्फ तुकाराम सखाराम केदार (६२) असे मृताचे नाव आहे.

प्राप्त माहितीनुसार, तालुक्यातील पिंजर येथील रहिवासी प्रभाकर ऊर्फ तुकाराम सखाराम हे व्यापारी आहेत. पुजेचे साहित्य घेऊन ते अकोल्याहून पिंजरकडे दुचाकीने घरी परत जात होते. बार्शीटाकळी ते पिंजर मार्गाने जात असताना वरखेड-अजनी फाट्यानजीक दुचाकी व कार क्रं.(एमएच३०, बीबी ३००६)ची समोरासमोर धडक झाली. या अपघातात प्रभाकर केदार यांचा मृत्यू झाला. अपघात एवढा भीषण होता, की दुचाकी चारही बाजूने वाकली आहे. या घटनेबाबत पोलिसांना माहिती मिळताच ठाणेदार मनोज लांडगे, जमादार नागसेन वानखेडे, सुरेंद्र जोशी आणि शरद सांगाडे यांनी घटनास्थळी धाव घेतली होती. घटनास्थळी त्यांच्याकडे असलेले पूजेचे साहित्य विखुरलेले दिसले.