कार-ट्रॅक्टरची धडक; एक ठार

तेल्हारा:

तालुक्यातील देवरी-अडसूळ रस्त्यावर उमरीनजीक ट्रॅक्टर व कारची धडक होऊन एक जण ठार झाल्याची घटना शुक्रवार, दि.२२ जानेवारी रोजी सायंकाळी ५ वाजताच्या सुमारास घडली. प्रकाश जांभे (३५) (रा. महेंद्र कॉलनी, अमरावती) असे मृताचे नाव आहे.

तेल्हारा पोलिसांनी दिलेल्या माहितीनुसार, देवरी-अडसूळ मार्गाने अमरावती येथील कौस्तुभ सुभाष शिंगणे (२५) व प्रकाश जांभे (३५) हे दोघे कार क्रमांक (एमएच २७, बीई ५८१) ने शेगावकडे जात असताना मार्गावरील उमरीनजीक मातीने भरलेला ट्रॅक्टर क्र. (एमएच३० बीबी १६३६) यास मागून धडक दिली. अपघात एवढा भीषण होता की ट्रॅक्टरची ट्रॉली उलटली होती. या अपघातात वाहनात बाजूला बसलेला प्रकाश जांभे (३५) याचा घटनास्थळीच मृत्यू झाला. वृत्त लिहीपर्यंत तेल्हारा पोलिसात गुन्हा दाखल करण्याची प्रक्रिया सुरू होती. (फोटो)