मालगाडीच्या गार्डचा डबा रुळावरून घसरला!

पाच दिवसांत तिसरी घटना

लोकमत न्यूज नेटवर्क
कुरूम : मध्य रेल्वेच्या भुसावळ मंडळांतर्गत येणाऱ्या मूर्तिजापूर-बडनेरादरम्यान कुरूम रेल्वे स्टेशनवर गिट्टी वाहून नेणाऱ्या मालगाडीच्या गार्डचा डबा गिट्टी डेपोच्या भिंतीला धडकल्याने मालगाडी रुळावरून घसरल्याची घटना १२ जुलै रोजी सायंकाळी ७ वाजता घडली.

कुरूम रेल्वे स्टेशनजवळ मालगाडी रुळावरून घसरण्याची मागील पाच दिवसांतील ही तिसरी घटना आहे, हे विशेष.
यापूर्वी ७ जुलै रोजी लुप लाइनवर जाणारी मालगाडीची वॅगन रुळावरून घसरली होती. यामुळे नागपूरकडे जाणाऱ्या गाड्या दोन ते अडीच तास उशिराने धावल्या होत्या. त्यानंतर ११ जुलै रोजी दुपारी गिट्टी डेपोतून गिट्टी भरून बडनेराकडे जाणाऱ्या मालगाडीची वॅगन त्याच डाउन लुप लाइनवर रुळावरून घसरली होती. त्यामुळेसुद्धा नागपूरकडे जाणाऱ्या गाड्या दोन ते अडीच तास उशिराने धावल्या होत्या. या घटनेपाठोपाठ १२ जुलै रोजी सायंकाळी ७ वाजता सदर मालगाडी गिट्टी खाली करून परत डेपोमध्ये गेली असता तेथे उभी करीत असताना अप सायडिंगच्या लाइनवर गार्डचा डबा डेपोच्या भिंतीला धडकल्याने मालगाडी रुळावरून खाली उतरली. सुदैवाने या घटनेत कुठल्याही प्रकारची जीवितहानी झाली नाही. मेनअप व डाउन लाइन सुरळीत असल्याने गाड्यांची रहदारी सुरळीत चालू आहे. या घटनेची माहिती मिळताच बडनेरा रेल अभियंता प्रमोद वाढेकर हे त्यांच्या अधिनस्त कर्मचाऱ्यांसह घटनास्थळी दाखल झाले असून, हे वृत्त लिहीपर्यंत गार्डचा डबा रुळावर ठेवण्याचे काम सुरू होते.