‘त्या’ जखमी महिलेच्या खांद्यातून काढले काडतूस!

बार्शीटाकळी: शहराच्या हालोपुरा भागामध्ये झालेल्या सशस्त्र हाणामारी व गोळीबारीमध्ये एक महिलेला पिस्तूलची गोळी लागल्याने गंभीर जखमी झाली होती. महिलेला स्पर्श करून पिस्तुलची गोळी गेल्याने महीला जखमी झाल्याचा दावा प्रशासनाकडून दावा केल्या जात होता; मात्र महिलेच्या खांद्याच्या मागच्या बाजूमध्ये गोळी होती. उपचारादरम्यान जखमी महिलेच्या खांद्यातून काडतूस काढण्यात आले.

मिळालेल्या प्राप्त माहितीनुसार, दि.२४ मे रोजी रात्री १२ वाजताच्या सुमारास जखमी महिलेल्या खांद्यातून गोळी अकोला येथील खासगी रुग्णालयात काढण्यात आली. सध्या महिलेवर उपचार सुरू आहेत. शहरात कापूस व्यापाऱ्यांमध्ये दोन गटात वाद झाला होता. यामध्ये काही आरोपींनी गावठी पिस्तूलमधून हवेत गोळीबार केला होता. त्याचवेळी एक महिला घटनास्थळावरून जात असताना तिला पिस्तुलची गोळी स्पर्श करून गेली, असे त्यावेळी प्रशासनाकडून सांगण्यात आले होते. मात्र उपचारादरम्यान महिलेच्या खांद्यांच्या मागच्या बाजूमधून पिस्तूलची गोळी काढण्यात आली. जखमी महिला गायगाव येथील रहिवासी असून, सुलताना परवीन असे नाव आहे. घटनेच्या रोजी ती आपल्या मुलीला भेटायला आली होती. सध्या आरोपी पोलीस कोठडीत असून, पुढील तपास पोलीस करीत आहेत.