ग्राहकांनी आपल्या हक्कांबाबत जागरूक राहावे

अकोला : जागतिक ग्राहक दिनानिमित्त पुरवठा विभागाच्यावतीने अप्पर जिल्हाधिकारी यांच्या दालनात ‘जागतिक ग्राहक दिन’ ऑनलाईन वेबीनारव्दारे साजरा करण्यात आला. ग्राहकांच्या हक्कांच्या संरक्षणासाठी ग्राहक न्यायमंचाची स्थापना करण्यात आली असून त्याद्वारे ग्राहकांना न्याय मिळवून दिला जातो. तथापि ग्राहकांनीही आपल्या हक्कांबाबत जागरूक रहावे व अन्यायकारक व्यापार पद्धतीस बळी पडू नये, असे आवाहन जिल्हा ग्राहक तक्रार निवारण मंचच्या अध्यक्ष श्रीमती एस. एम. उंटवाले यांनी केले.

यावेळी अपर जिल्हाधिकारी अनिल खंडागळे, जिल्हा पुरवठा अधिकारी बाबासाहेब गाढवे, जिल्हा सूचना अधिकारी अनिल चिंचोले, ग्राहक तक्रार निवारण मंचच्या अध्यक्ष श्रीमती एस. एम. उंटवाले, राष्ट्रीय ग्राहक संरक्षण संघाचे अध्यक्ष संजय पाठक तसेच जिल्ह्यातील गॅस एजन्सी, सहायक आयुक्त अन्न व प्रशासन, वजन मापे निरीक्षक, वीज वितरण कंपनी व तसेच सर्व निरीक्षण अधिकारी आदी उपस्थित होते.

कोरोना विषाणू प्रादुर्भावाच्या पार्श्वभूमीवर जागतिक ग्राहक दिन ऑनलाईन वेबिनारव्दारे घेण्यात आला. यावेळी श्रीमती एस. एम. उंटवाले यांनी ग्राहक संरक्षण कायदा २०१९ च्या सुधारित कायद्यातील तरतुदीच्या अनुषंगाने ग्राहकांच्या हक्कांना प्रोत्साहन, संरक्षण देऊन ग्राहक संरक्षणाची अंमलबजावणी करण्यासाठी केंद्रीय ग्राहक संरक्षण प्राधिकरणाची स्थापना करण्यात आली आहे. ग्राहकांच्या हक्कांचे उल्लंघन, तपासणी, तक्रारी, खटला चालविणे, असुरक्षित वस्तू व सेवा परत मागविणे, अन्यायकारक व्यापार पद्धती बंद करणे व दिशाभूल करणाऱ्या जाहिरातींवर दंड आकारणे आदींच्या अधिकाराबाबत मार्गदर्शन केले. तसेच ग्राहक संरक्षण कायद्याच्या अंतर्गत येणाऱ्या खटल्यांबाबत जिल्हा, राज्य व केंद्र यांच्याकडे असणारे खटले चालवण्यासंदर्भातील वित्तीय अधिकाराची जाणीव करून दिली. ग्राहकांना न्याय मिळविण्यासाठी खटले सर्वोच्च न्यायालयातसुद्धा चालवू शकतात याची माहिती दिली.

संचालन शीतल मोरखडे यांनी केले तर प्रास्ताविक जिल्हा पुरवठा अधिकारी बाबासाहेब गाढवे यांनी केले. आभार प्रदर्शन अन्नधान्य वितरण अधिकारी बी. डी. अरखराव यांनी केले.