Corona Cases in Akola : आणखी सात कोरोना पॉझिटिव्ह

Corona Cases in Akola: सात नवे रुग्ण आढळून आल्याने आतापर्यंतची एकूण रुग्णसंख्या ५७,७७४ झाली आहे.

अकोला : गत काही दिवसांपासून जिल्ह्यात कोरोनाबाधित होणाऱ्यांचा आकडा घसरला असताना, बुधवारी आणखी सात पॉझिटिव्ह रुग्णांची नोंद झाली. आरटीपीसीआर चाचण्यांमध्ये पाच, तर रॅपिड ॲन्टिजन चाचण्यांमध्ये दोन असे सात नवे रुग्ण आढळून आल्याने आतापर्यंतची एकूण रुग्णसंख्या ५७,७७४ झाली आहे.

शासकीय वैद्यकीय महाविद्यालयाच्या व्हीआरडीएल लॅबकडून बुधवारी आरटीपीसीआर चाचण्यांचे ४३१ अहवाल प्राप्त झाले. यापैकी पाच जणांचे अहवाल पॉझिटिव्ह असून, उर्वरित ४२६ जणांचे अहवाल निगेटिव्ह आहेत. पॉझिटिव्ह रुग्णांमध्ये अकोला शहरातील तीन, तर तेल्हारा व मूर्तिजापूर येथील प्रत्येकी एकाचा समावेश आहे. मंगळवारी दिवसभरात करण्यात आलेल्या ७२५ रॅपिड ॲन्टिजन चाचण्यांमध्ये अकोला शहरातील एक व शासकीय वैद्यकीय महाविद्यालयातील एक अशा दोघांचा अहवाल पॉझिटिव्ह आला आहे.

 

४४ ॲक्टिव्ह रुग्ण

बुधवारी खासगी इस्पितळातून आणखी एकास डिस्चार्ज देण्यात आल्यामुळे काेरोनावर मात करण्यांची संख्या ५६,५९६ झाली आहे. आतापर्यंत ११३४ जणांचा मृत्यू झाला असून, सद्यस्थितीत ४४ ॲक्टिव्ह रुग्णांवर उपचार सुरू आहेत.