डॅडी देशमुख जीवन गाैरव पुरस्काराने

अकोला : स्व. बाबूराव साहेबराव उपाख्य डॅडी देशमुख जयंती समारोह व पुरस्कार वितरण सोहळा रविवारी येथे पार पडला. यावेळी ज्येष्ठ रंगकर्मी अरुण घाटोळ यांना डॅडी देशमुख स्मृती जीवन गौरव पुरस्काराने पालकमंत्री ना. बच्चू कडू यांच्या हस्ते सन्मानित करण्यात आले.

　　　 या कार्यक्रमास विधान परिषद सदस्य आमदार अमोल मिटकरी, महापौर अर्चनाताई मसने, माजी आमदार तुकाराम बीडकर, बल्लूभाऊ जवंजाळ, प्रा.डॉ. संतोष हुसे तसेच संयोजन समितीचे प्रा. मधू जाधव, संजय खडपकर, सदाशिव शेळके, अशोक रहाटे, प्रशांत देशमुख तसेच देशमुख परिवारातील सदस्य उपस्थित होते.

यावेळी आमदार अमोल मिटकरी म्हणाले की, कला क्षेत्रात युवक- युवतींनी पुढे यावे. जिल्ह्यातील सांस्कृतिक चळवळीला उत्तेजन मिळावे, अशी अपेक्षा त्यांनी व्यक्त केली. नव्या जोमाच्या तरुण-तरुणींनी अकोल्याचा कला सांस्कृतिक क्षेत्रात नावलौकिक करावा, हे डॅडी देशमुखांचे स्वप्न पूर्ण करावे, असं आवाहन केलं.

सन्मानार्थी अरुण घाटोळे यांनी सत्काराला उत्तर दिले. ते म्हणाले की, रंगभूमी ही माणसाला वास्तविक माणूस म्हणूनच दाखवते. माणसाला माणूस म्हणून दाखवणाऱ्या या वास्तव माध्यमातच मी काम केले. नाटकातून समाजातील विविध प्रश्नांवर प्रकाश टाकण्याचा प्रयत्न केला. या पुरस्कार प्राप्त झाल्याबद्दल त्यांनी समाधान व्यक्त केले.

या कार्यक्रमाच्या निमित्ताने रंगभूमी परिनिरीक्षण मंडळ सदस्य रमेश थोरात, माहितीपट निर्माते डॉ. राजेश देशमुख, सौंदर्य स्पर्धा विजेती कु. पूजा विष्णू मुळे यांचा सत्कार उपस्थित मान्यवरांच्या हस्ते करण्यात आला. अध्यक्षीय समारोपात महापौर मसने यांनी शहरातील सांस्कृतिक चळवळीला उत्तेजन देण्यासाठी सहयोग देऊ, असे सांगितले.

प्रास्ताविक तुकाराम बीडकर यांनी केले. प्रा. मधू जाधव यांनी ज्येष्ठ रंगकर्मी अरुण घाटोळे यांच्या कार्याचा परिचय करून दिला. सूत्रसंचालन किशोर बळी यांनी केले. आभार प्रदर्शन सदाशिव शेळके यांनी केले.