आगर परिसरात रिमझिम पाऊस; शेतकरी धास्तावले

आगर : परिसरात सोमवारी दुपारच्या सुमारास अवकाळी पावसाने हजेरी लावल्याने शेतकरी धास्तावले आहेत. गत दोन दिवसांपासून परिसरात ढगाळ वातावरण असल्याने रब्बी पिके धोक्यात सापडले आहे. हरभऱ्यावर अळींचे आक्रमण वाढल्याने यंदा उत्पादनात घट होण्याची शक्यता शेतकऱ्यांनी वर्तविली आहे.

आगर परिसरात गत दोन दिवसांपासून ढगाळ वातावरण आहे. सोमवारी उगवा, आगर, पाळोदी, नवळथ आदी परिसरात अवकाळी पावसाने हजेरी लावल्याने शेतकरी चिंतातुर झाला आहे. सध्या परिसरात तुरीचे पीक सोंगणीला आले असून, पावसामुळे तुरीचे मोठ्या प्रमाणात नुकसान होण्याची भीती असल्याने शेतकरी धास्तावला आहे. खरीप हंगामात सततचा पाऊस व परतीच्या पावसामुळे सर्वच पिकांचे नुकसान झाले. त्यानंतर कपाशीवर बोंडअळीने आक्रमण केल्याने कपाशीच्या उत्पादनात घट होऊन लागवडीचा खर्चही वसूल झाला नाही. असे असतानाही शेतकऱ्यांनी पैशांची जुळवाजुळव करून रब्बी हंगामात पेरणी केली. सध्या हरभऱ्याचे पीक बहरले असून, फूलधारणा अवस्थेत आहे. गत दोन दिवसांपासून असलेल्या ढगाळ वातावरण व सोमवारी आलेल्या अवकाळी पावसामुळे रब्बी पिके संकटात सापडले आहे. (फोटो)

-----------------------------------

हरभऱ्याचे पीक फूलधारणा अवस्थेत आहे. त्यातच ढगाळ वातावरणामुळे फूलगळ होत असल्याने उत्पादनात घट होण्याची शक्यता आहे.

- शेतकरी आगर

----------------------------

हरभरा पिकाची फूलगळ

आगर परिसरात रब्बी हंगामात हरभऱ्याचा पेरा वाढला आहे. थंडीचा जोर वाढल्याने सध्या पीक बहरले असून, फूलधारणा अवस्थेत आहे. अशातच गत दोन दिवसांपासून ढगाळ वातावरण असल्यामुळे हरभऱ्याची फूलगळ होत असून, उत्पादनात घट होण्याची शक्यता आहे. तसेच हरभऱ्यावर अळीचा प्रादुर्भाव वाढल्याचे चित्र आहे.