फेसबुक प्रेमाने केला घोर!

शिक्षिकेचा लैंगिक छळ करणा-यांना पोलीस कोठडी

अकोला: फेसबुक सोशल नेटवर्किंगच्या माध्यमातून झालेल्या प्रेमप्रकरणानंतर प्रियकराने प्रेयसी शिक्षिकेला पेस्ट्रीतून गुंगीचे औषध देऊन तिचा लैंगिक छळ केल्याचा प्रकार समोर आल्यानंतर खदान पोलिसांनी या प्रकरणातील एका आरोपींस अटक केली. त्यांना शुक्रवारी न्यायालयासमोर हजर केले असता न्यायालयाने ६ जूनपर्यंत पोलीस कोठडी सुनावली आहे.
खदान पोलीस ठाण्याच्या हद्दीत राहणार्‍या एका २७ वर्षीय शिक्षिकेची फेसबुक सोशल नेटवर्किंंगच्या माध्यमातून कोठारी कॉन्व्हेंटजवळ राहणारा दीपक महावीर शर्मा याच्यासोबत ओळख झाली. पुढे ओळखीचे रूपांतर प्रेमात झाले. दीपक शर्मा हा बोरगाव मंजू येथील अग्रसेन बँकेत कार्यरत आहे. भेटीगाठी सुरू झाल्या. आरोपी दीपक शर्मा याने शिक्षिकेला शरीरसुखाची मागणी केली; परंतु शिक्षिकेने त्यास नकार दिला. त्यानंतर आरोपीने शिक्षिकेला पेस्ट्रीतून गुंगीचे औषध देऊन तिच्यावर लैंगिक अत्याचार केला आणि त्या अत्याचाराचे व्हिडिओ चित्रीकरण करून शिक्षिकेचे नग्न फोटो काढल्याचा धक्कादायक आरोप शिक्षिकेने केला आहे.शिक्षिकेने तिच्या अत्याचाराबाबत आरोपीची आई रेखा महावीर शर्मा हिला सांगितले असता, तिने शिक्षिकेला जातीवाचक शिवीगाळ केली आकाश महावीर शर्मा, आशीष महावीर शर्मा यांनी शिक्षिकेचे हात पकडून तिचा विनयभंग केला. शिक्षिकेने दिलेल्या तक्रारीवरून खदान पोलिसांनी आरोपी दीपक महावीर शर्मा, त्याची आई रेखा शर्मा, भाऊ आकाश व आशीष शर्मा यांच्याविरुद्ध भादंवि कलम ३७६, ३५४, ३२३(३४) नुसार गुन्हा दाखल केला.