चांगेफळ येथे जुन्या वादातून हाणामारी, नऊ आरोपींविरुद्ध गुन्हा दाखल

जुन्या वादाच्या कारणावरून एक आरोपीने विवाहित महिलेच्या घरात घुसून तिचा हात पकडून विनयभंग केला. विवाहितेने आरडाओरडा केल्यावर नऊ आरोपींनी विवाहितेच्या आईला कपाशी उपटण्याच्या लोखंडी चिमटा व लाठ्या काठ्याने मारहाण केली. या मारहाणीमध्ये विवाहितेची आई चंद्रकलाबाई मधुकर घटे गंभीर जखमी झाल्या आहेत. तिच्या नातेवाइकांनी गंभीर महिलेला घेऊन चान्नी पोलीस स्टेशनमध्ये धाव घेतली. पोलिसांनी गंभीर महिलेला उपचारासाठी चतारी ग्रामीण रुग्णालयात नेले असता, तेथील डॉक्टरांनी प्रथम उपचार केल्यानंतर पुढील उपचारासाठी सर्वोपचार रुग्णालय येथे हलविले आहे. या प्रकरणी गंभीर चान्नी पोलिसांनी आरोपी रामेश्वर नागोजी चवरे, महादेव नागोजी चवरे, श्रीकृष्ण गजानन बघे, मंगेश गजानन बघे व पाच महिला अशा एकूण नऊ आरोपीविरुद्ध भादंवि कलम ३२६, ३५४, ४५२, ३२४, १४३, १४७, १४८, ५०४, ५०६ नुसार गुन्हा दाखल केला. पोलिसांनी रामेश्वर चवरे, श्रीकृष्ण बघे यांना अटक केली. पुढील तपास चान्नी पोलीस स्टेशनचे ठाणेदार राहुल वाघ यांच्या मार्गदर्शनात बाळकृष्ण येवले, सुधाकर करवते करीत आहेत.