आईची हत्या करणाऱ्या मुलीची कारागृहात रवानगी

अकोला : जुन्या आरटीओ रोडवरील गिरी नगरातील स्वप्नशिल्प अपार्टमेंटमध्ये जन्मदात्या आईची हत्या करणाऱ्या मुलीची पोलीस कोठडी संपल्याने रविवारी तिला न्यायालयासमोर हजर केले असता न्यायालयाने आरोपीची न्यायालयीन कोठडीत रवानगी केली.

स्वप्नशिल्प अपार्टमेंट येथे सरूबाई काशीनाथ कांडेलकर (वय ६१) या राहत होत्या. त्यांच्या पतीचे निधन झाल्यानंतर तीनच मुली असल्याने त्यांनी शेतीवाडी व इतर प्रॉपर्टी त्यांच्या तीनही मुलींना वाटप केली. यामधील कविता बायस्कर हिला एका शेतजमिनीतील सात गुंठे हिस्सा अधिकचा मिळाला होता. त्यामुळे सरूबाई कांडेलकर यांनी कविताला एक लाख रुपयांची मागणी केली. यावरूनच दोघींमध्ये वाद झाले. याच वादातून बुधवारी सायंकाळी कविता बायस्कर हिने आई सरूबाई कांडेलकर यांचे डोके घरातील पाट्यावर आदळून त्यांची हत्या केली होती. या हत्येनंतर कविता बावस्कर हिने किरकोळ वादातून आई जमिनीवर कोसळून त्यांचा मृत्यू झाल्याचा बनाव पोलिसांसमोर केला. मात्र पोलिसांनी कविताला ताब्यात घेऊन कसून चौकशी केली असता तिने एक लाख रुपयांसाठी हे हत्याकांड केल्याची कबुली दिली. पोलिसांनी तिच्याविरुद्ध गुन्हा दाखल करून न्यायालयासमोर हजर केले असता न्यायालयाने आरोपी कविताला १४ मार्चपर्यंत पोलीस कोठडी सुनावली होती. पोलीस कोठडी संपल्याने तिला रविवारी न्यायालयासमोर हजर केले असता न्यायालयाने कविताची कारागृहात रवानगी केली.