अकोट शहरातून गुटख्याचा साठा जप्त

अकोला : अकोट शहर पोलीस ठाण्याच्या हद्दीतील सिंधी कॅम्प परिसरातून गुटख्याची अवैधरीत्या विक्री करणाऱ्या दोन जणांवर पोलीस अधीक्षक जी. श्रीधर यांच्या विशेष पथकाने शुक्रवारी छापा टाकला. या दोघांकडून गुटख्याचा साठा जप्त करण्यात आला असून त्यांच्याविरुद्ध अकोट शहर पोलीस ठाण्यात गुन्हा दाखल करण्यात आला आहे.

अकोट शहरातील सिंधी कॅम्प परिसरात सुनील कियलदास जेसवानी व रवी रतनलाल जाधवाणी हे दोघे प्रतिबंधित असलेल्या वाह, विमल, सितार या गुटख्याची मोठ्या प्रमाणात अवैधरीत्या विक्री करीत असल्याची माहिती पोलीस अधीक्षक यांच्या विशेष पथकाचे प्रमुख विलास पाटील यांना मिळाली. या माहितीवरून यांनी पथकासह छापा टाकून दोघांच्या घरांतून गुटख्याचा साठा जप्त केला. त्यांच्याविरुद्ध अकोट शहर पोलीस ठाण्यात गुन्हा दाखल करण्यात आला आहे. ही कारवाई पोलीस अधीक्षक जी. श्रीधर, अतिरिक्त पोलीस अधीक्षक मोनिका राऊत, शहर पोलीस उपअधीक्षक सचिन कदम यांच्या मार्गदर्शनाखाली विशेष पथकाचे प्रमुख विलास पाटील व त्यांच्या पथकाने केली.