महिलेच्या घरात तलवार घेऊन घुसलेल्या चौघांचा धुडगूस

घरातील साहित्य तोडफोड: मूर्तीचीही विटंबना, जुन्या वादातून मारहाण

अकोला : जुन्या वादातून चार युवकांनी तलवार घेऊन रमाबाई आंबेडकर नगरात राहणाऱ्या महिलेच्या घरात घुसून साहित्याची तोडफोड करून महापुरुषांच्या मूर्तीची विटंबना केली आणि महिला व तिच्या पतीस मारहाण केली. ही घटना गुरुवारी रात्री ११ वाजताच्या सुमारास घडली. याप्रकरणी रात्री उशिरापर्यंत जुने शहर पोलीस ठाण्यात गुन्हा दाखल करण्याची प्रक्रिया सुरू होती.
वाशिम बायपास रोडवरील रमाबाई आंबेडकर नगरात राहणाऱ्या रोशनी सरदार यांनी दिलेल्या तक्रारीनुसार काही दिवसांपूर्वी युवकांसोबत किरकोळ कारणावरून वाद झाला होता. त्यांनी याप्रकरणी पोलीस ठाण्यात तक्रारही केली होती. पोलिसांनी एका आरोपीस अटक केली; परंतु आरोपी जामिनावर बाहेर आल्यावर त्याने व त्यासोबतच्या फैजल, अकबर, छोट्या आणि इमरान नामक युवकांनी हातात तलवार, लोखंडी पाइप घेऊन गुरुवारी रात्री रोशनी सरदार यांचे घर गाठले आणि घरातील वस्तूंची तोडफोड केली. घरातील महापुरुषांच्या मूर्ती फोडून विटंबना केली, तसेच रोशनी सरदार यांच्यासह लखन सरदार यांना मारहाण करून जखमी केले. घटनास्थळाला ठाणेदार रियाज शेख यांनी भेट दिली आणि आरोपींना तातडीने अटक करण्यासाठी पथक पाठविले. रोशनी सरदार यांच्या तक्रारीनुसार जुने शहर पोलिसांनी आरोपी फैजल, अकबर, छोट्या, इमरान नामक युवकांवर भादंवि कलम २९३, ३२४, ३२३, अ‍ॅट्रॉसिटीनुसार गुन्हा दाखल केला.