जिल्हा परिषद सभेतील मंजूर ठरावांविरोधातील अपिलावर आज सुनावणी!

अकोला: आचारसंहिता लागू असल्याच्या कालावधीत जिल्हा परिषदेच्या २३ जून रोजीच्या सर्वसाधारण सभेत मंजूर करण्यात आलेल्या विविध ठरावांविरोधात विरोधकांनी दाखल केलेल्या अपिलावर मंगळवार, २४ ऑगस्ट रोजी विभागीय आयुक्त कार्यालयात सुनावणी घेण्यात येणार आहे.

गत २३ जून रोजी जिल्हा परिषदेची सर्वसाधारण सभा घेण्यात आली. त्यावेळी जिल्हा परिषद व पंचायत समित्यांच्या रिक्त जागांच्या पोटनिवडणुकांसाठी आचारसंहिता लागू असताना जिल्हा परिषदेच्या सर्वसाधारण सभेत विविध ठराव मंजूर करण्यात आले. त्यामुळे आचारसंहितेचा भंग झाल्याने, सर्वसाधारण सभेत मंजूर करण्यात आलेल्या विविध ठरावांविरोधात जिल्हा परिषदेतील विरोधी पक्ष असलेल्या शिवसेना जिल्हा परिषद सदस्यांच्या वतीने गटनेता गोपाल दातकर व सदस्य डाॅ. प्रशांत अढाऊ यांनी अमरावती विभागीय आयुक्तांकडे धाव घेत अपील दाखल केले होते. या अपिलावर मंगळवार, २४ ऑगस्ट रोजी अमरावती विभागीय आयुक्त कार्यालयात अंतिम सुनावणी होणार आहे. त्या अनुषंगाने जिल्हा परिषद सर्वसाधारण सभेतील मंजूर ठरावांविरोधात विरोधकांनी दाखल केलेल्या अपिलावर विभागीय आयुक्तांकडून काय आदेश पारित होतो, याकडे आता जिल्हा परिषद वर्तुळाचे लक्ष लागले आहे.