जुने शहरातील कुख्यात आरोपी एक वर्षासाठी स्थानबद्ध

अकोला : जुने शहरातील रहिवासी, तसेच कुख्यात गुंड शाकीर खान ऊर्फ पपया अहमद खान यास जिल्हाधिकारी, पोलीस अधीक्षक जी. श्रीधर यांच्या आदेशानंतर सोमवारी जिल्हा मध्यवर्ती कारागृहात एक वर्षासाठी स्थानबद्ध करण्यात आले आहे. पोलीस अधीक्षक जी. श्रीधर यांनी गुन्हेगारी कमी करण्यासाठी त्यांच्यावर कठोर कारवाई सुरू केली आहे.

जुने शहरातील हमजा प्लॉट परिसरातील रहिवासी शाकीर खान ऊर्फ पपया अहमद खान हा कुख्यात गुंड असून, पोलिसांच्या कारवाईला जुमानत नसल्याचे समोर आले. त्याच्याविरुद्ध यापूर्वी गंभीर गुन्हे दाखल असून, यामध्ये दुखापत करणे, शिवीगाळ करणे, जिवे मारण्याची धमकी देणे, बेकायदेशीररीत्या शस्त्र बाळगणे, विनयभंग करणे या गुन्ह्यांचा समावेश आहे. पोलिसांनी त्याच्यावर प्रतिबंधात्मक कारवाई केली. मात्र, या कारवाईला जुमानत नसल्याने त्याच्याविरुद्ध एमपीडीएअंतर्गत मध्यवर्ती कारागृहात एक वर्षासाठी स्थानबद्ध करण्यासाठीचा प्रस्ताव जिल्हाधिकारी जितेंद्र पापळकर यांच्याकडे सादर करण्यात आला.

जिल्हाधिकाऱ्यांनी या प्रस्तावाला मंजुरी देऊन या आरोपीला एक वर्षासाठी स्थानबद्ध करण्याचा आदेश पारित केला. त्यानंतर पोलीस अधीक्षक जी. श्रीधर, अतिरिक्त पोलीस अधीक्षक मोनिका राऊत यांच्या मार्गदर्शनाखाली पथकाने आरोपीचा शोध घेऊन त्यास जिल्हा मध्यवर्ती कारागृहात एक वर्षासाठी स्थानबद्ध केले आहे. ही कारवाई शहर पोलीस उपधीक्षक सचिन कदम यांच्या मार्गदर्शनाखाली जुने शहर पोलीस स्टेशनचे ठाणेदार महेंद्र देशमुख, स्थानिक गुन्हे शाखेचे प्रमुख शैलेश सपकाळ यांनी केली.

जुने शहर पोलीस स्टेशन नंबर वन

जुने शहर पोलीस ठाण्याच्या हद्दीत गुंडगिरी प्रचंड वाढली असतानाच या पोलीस ठाण्याचा पदभार महेंद्र देशमुख यांच्याकडे देण्यात आला. त्यानंतर ठाणेदार महेंद्र देशमुख यांच्या कालावधीत तब्बल आठ गुंडांवर एमपीडीए कारवाई करण्यात आली आहे. या कारवाईत जिल्ह्यात जुने शहर पोलीस स्टेशन क्रमांक १ वर असल्याची माहिती आहे. जिल्ह्यातील २३ पोलीस ठाण्याच्या हद्दीतील २८ गुंडांवर एमपीडीए कारवाई करण्यात आल्या असून, यापैकी जुने शहर पोलीस ठाण्यात ८ जणांवर कारवाई करण्यात आली आहे. यावरून जुने शहर पोलीस स्टेशनचे ठाणेदार महेंद्र देशमुख यांनी गुन्हेगारांचा बीमोड करण्याचा प्रयत्न केला आहे.