जिल्हयातील बदली पात्र शिक्षकांची माहिती मागविली!

अकोला : जिल्हा परिषद अंतर्गत जिल्ह्यातील प्राथमिक शिक्षकांच्या जिल्हा अंतर्गत बदल्यांची प्रक्रिया मे महिन्या अखेरपर्यंत राबविण्यात येणार आहे. त्यासाठी जिल्ह्यातील बदली पात्र शिक्षकांची माहिती १६ एप्रिलपर्यंत मागविण्यात आली असून, यासंदर्भात जिल्हा परिषद प्राथमिक शिक्षणाधिकाऱ्यांनी ९ एप्रिल रोजी जिल्ह्यातील सातही पंचायत समित्यांच्या गटशिक्षणाधिकाऱ्यांना (बीईओ) पत्राव्दारे सूचना दिल्या आहेत.

शासनाच्या ग्रामविकास विकास विभागाच्या ७ एप्रिल रोजीच्या निर्णयानुसार जिल्हा परिषद शिक्षकांच्या जिल्हा अंतर्गत बदल्यांसंदर्भात मार्गदर्शक सूचना जिल्हा परिषद प्राथमिक शिक्षण विभागाला प्राप्त झाल्या आहेत. त्यानुसार जिल्हा परिषद अंतर्गत प्राथमिक शिक्षकांच्या जिल्हा अंतर्गत बदल्यांची प्रक्रिया ३१ मे पर्यंत पूर्ण करावयाची आहे. त्यानुषंगाने जिल्ह्यातील जिल्हा परिषद शिक्षकांच्या जिल्हा अंतर्गत बदल्यांसाठी पंचायत समितीनिहाय बदली पात्र आणि बदली अधिकार पात्र शिक्षकांची माहिती १६ एप्रिलपर्यंत जिल्हा परिषद प्राथमिक शिक्षण विभागामार्फत मागविण्यात आली आहे. यासंदर्भात जिल्हा परिषद प्राथमिक शिक्षणाधिकाऱ्यांनी जिल्ह्यात सातही पंचायत समित्यांच्या गटशिक्षणाधिकाऱ्यांना ९ एप्रिल पत्राव्दारे सूचना दिल्या आहेत. बदली पात्र शिक्षकांची माहिती प्राप्त झाल्यानंतर शिक्षकांच्या जिल्हा अंतर्गत बदल्यांची प्रक्रिया जिल्हा परिषद प्राथमिक शिक्षण विभागामार्फत सुरू करण्यात येणार आहे.