लॉकडाऊनमुळे टरबूज शेतीला आर्थिक फटका!

मूर्तिजापूर : गत वर्षापासून सर्वत्र कोरोना महामारीचा कहर सुरू आहे. कोरोनाचा प्रतिबंध करण्यासाठी लॉकडाऊन करण्यात आले. याचा कृषी क्षेत्रावर दूरगामी परिणाम झाल्याचे दिसून येत आहे. तालुक्यात इतर शेती व्यवसायांसोबतच टरबूज शेतीला प्रचंड आर्थिक फटका बसला आहे.

तालुक्यात लॉकडाऊनमुळे टरबूज उत्पादक शेतकरी संकटात सापडले आहेत.

तालुक्यातील धोत्रा शिंदे या गावातील शेतकरी दरवर्षी शेतात विविध प्रयोग करून काहीतरी वेगळं करण्याच्या प्रयत्नात असतात. इथल्या काही शेतकऱ्यांनी वेगवेगळ्या तब्बल आठ एकर क्षेत्रावर यावर्षी टरबूज लागवडीचा यशस्वी प्रयोग केला. पिकाची लागवड, देखरेख, मशागतीवर नऊ लाख रुपये खर्चही केला. मात्र, ऐनवेळी लागलेल्या लॉकडाऊनमुळे उत्पादित झालेल्या मालाला योग्य भाव व बाजारपेठ मिळाली नसल्याने लागवडीसाठी लागलेला लाखो रुपयांचा खर्चही निघत नसल्याने शेतकऱ्यांचे प्रचंड नुकसान झाले आहे. शेतकऱ्यांना दरवर्षी टरबूज शेतीतून बऱ्यापैकी आर्थिक फायदा होतो. परंतु, यावर्षी विक्री न झाल्याने संपूर्ण शेतीतील टरबुजाचे पीकच वाया गेले आहे. परिणामी शेतीला लागलेला खर्चसुद्धा निघाला नसल्यामुळे खरिपाची पेरणीपूर्व मशागत व पेरणी कशी करावी, हा प्रश्न उभा ठाकला आहे. झालेल्या नुकसानीबाबत शासनाकडून मदतीची मागणी शेतकऱ्यांकडून होत आहे.

फोटो:

मी थेट टरबूज व खरबूज रोपे मागवून त्याची चार एकर शेतीत लागवड केली. त्यासाठी अडीच लाख रुपये खर्च झाला. परंतु, लॉकडाऊनमुळे बाजारात टरबूज व खरबूज फळांना मागणी नसल्याने प्रचंड आर्थिक फटका बसला आहे.

-शिरीष देशमुख

टरबूज उत्पादक शेतकरी, सिरसो

लॉकडाऊन असल्याने व्यापारी माल घ्यायला तयार नाही. टरबूज शेतीतून उत्पादन झाले. परंतु, लॉकडाऊनमुळे टरबुजाची विक्री करता आली नाही. यामुळे लाखो रुपयांचे नुकसान झाले आहे. शासनाने नुकसानभरपाई द्यावी, अशी आमची मागणी आहे.

-शेख समीर

टरबूज उत्पादक शेतकरी, धोत्रा शिंदे

मार्चमध्ये दोन एकर शेतात टरबूज लागवड केली. त्यासाठी दीड लाख रुपये खर्च झाला. लॉकडाऊनमुळे व्यापारी माल घेत नसल्याने व बाजारपेठ बंद असल्याने संपूर्ण टरबूज फेकून देण्याची किंवा फुकट वाटण्याची शेतकऱ्यावर वेळ आली आहे.

-शराफत अली

टरबूज उत्पादक शेतकरी, धोत्रा शिंदे