अल्पवयीन मुलीचा विनयभंग; आरोपी फरार

पातूर येथील घटना.

पातूर, दि. १५- अल्पवयीन युवतीचा विनयभंग केल्याप्रकरणी युवकाविरुद्ध गुन्हा दाखल करण्यात आला आहे. ही घटना शहरातील टीकेव्ही चौकात घडली. १२ व्या वर्गात शिकत असलेल्या अल्पवयीन मुलीस सनी बगाडे याने शाळेमध्ये येऊन शिवीगाळ केली. मुलीने दिलेल्या तक्रारीत सनी बगाडे, अमित व अन्वेश पवार हे नेहमीच शाळेत येता-जाता अश्लील चाळे करून अश्लील कॉमेंट्स करून छेडखानी करतात, असे म्हटले आहे. या छेडखानीला कंटाळून मुलीने सदर प्रकार आपल्या आईला सांगितला. त्या मुलीच्या आईने शाळा गाठून हा प्रकार सांगितला. यावेळी सनी बगाडे यास बोलावून समजावून सांगण्यात आले. त्यानंतर सनीच्या भावाला हा प्रकार कळल्याने तो चाकू घेऊन अल्पवयीन मुलगी, तिची आई व भावास मारण्यासाठी आला होता. घटनास्थळावरील अण्णा पोहरे व दिनेश यांनी वेळीच समयसूचकता दाखवत त्याला अडविले. याबाबतची माहिती पातूर पोलिसांना समजताच त्वरित घटनास्थळावर दाखल झाले व परिस्थितीवर नियंत्रणात आणली. या प्रकरणी अल्पवयीन मुलीच्या तक्रारीवरून सनी बगाडे व त्याचा भाऊ व अधिक एक यांच्याविरुद्ध कलम ३५४ (१) (ए) (डी) ३४ भादंविनुसार गुन्हे दाखल करण्यात आले असून, वृत्त लिहिस्तोवर अटक करण्यात आली नव्हती.