हत्या प्रकरणातील तक्रारदाराला ठार मारण्याची धमकी!

मागील वर्षी १ ऑक्टोबरला शिक्षक जुबेर अहमद खान यांची हत्या अकोला रोडवरील कान्हेरी सरप गावाजवळ झाली होती. या प्रकरणात थोरल्या भावाने फिर्याद दिली होती. त्याप्रकरणी तिन्ही आरोपींविरूद्ध खुनाचा गुन्हा दाखल करण्यात आला होता, तर दोन आरोपींना पोलिसांनी अटक केली होती. याप्रकरणी तक्रारदाराला १६ मे रोजी दोघांनी जीवे मारण्याची धमकी दिली. तक्रारदाराने पोलिसात तक्रार दिली आहे.

हत्या प्रकरणातील तिसरा आरोपी अद्याप फरार आहे. थोरला भाऊ जमील अहमद न्याय मिळविण्यासाठी धडपडत आहे. या प्रकरणात त्याच्या हस्तक्षेपावरून बार्शीटाकळीस्थित अकोला ते मंगरूळपीर रोडवर आमराईमध्ये १६ मे रोजी दोन अज्ञात लोकांनी जमील अहमद यांना जीवे मारण्याची धमकी दिली. खुनाच्या प्रकरणात हस्तक्षेप करू नका, अन्यथा तुम्हाला तुमच्या भावासारखेच ठार मारू. अशी धमकी आरोपींनी त्यांना दिली. या प्रकरणी कलम ५०६ अन्वये गुन्हा दाखल करण्यात आला आहे. या प्रकरणाची पीएसआय अरुण मुंडे चौकशी करीत आहेत.

आठ महिन्यांपासून आरोपी गवसेना!

हत्या प्रकरणाला आठ महिने उलटले असले तरी, यातील तिसरा आरोपी अद्याप फरार आहे. हा तिसरा आरोपी गावात मोकाट फिरत असून, पोलीस त्याला अटक करीत आहे. पोलिसांना तिसरा आरोपी सापडत नसल्याचे आश्चर्य आहे.