अकोल्याचे नवे तहसीलदार सुनील पाटील !

अकोला : शासनाच्या आदेशानुसार १७ सप्टेंबर रोजी महसूल विभागातील अधिकाऱ्यांच्या बदल्या करण्यात आल्या आहेत. त्यामध्ये यवतमाळ येथील सहायक जिल्हा पुरवठा अधिकारी सुनील पाटील अकोल्याचे नवे तहसीलदार म्हणून येत असून, जिल्हाधिकारी कार्यालयातील नझूल तहसीलदार संतोष येवलीकर यांची तेल्हारा येथे तहसीलदारपदी बदली करण्यात आली. त्यांच्या जागी शेगावच्या तहसीलदार शिल्पा बोबडे नव्या नझूल तहसीलदार म्हणून येत आहेत.

अकोल्याचे तहसीलदारपद गेल्या सहा महिन्यांपासून रिक्त होते. प्रभारी तहसीलदार म्हणून अन्नधान्य वितरण अधिकारी बळवंतराव अरखराव कारभार सांभाळत होते. दरम्यान, शासन आदेशानुसार महसूल अधिकाऱ्यांच्या बदल्या करण्यात आल्या. त्यामध्ये यवतमाळ येथील सहायक जिल्हा पुरवठा अधिकारी सुनील पाटील यांची अकोला येथे नवे तहसीलदार म्हणून बदली करण्यात आली. तसेच अकोला जिल्हाधिकारी कार्यालयातील नझूल तहसीलदार संतोष येवलीकर यांची तेल्हारा येथे तहसीलदार म्हणून बदली करण्यात आली असून, त्यांच्या जागी शेगाव येथील तहसीलदार शिल्पा बोबडे या अकोला जिल्हाधिकारी कार्यालयात नझूल तहसीलदार म्हणून येत आहेत. यासोबतच जिल्हाधिकारी कार्यालयातील संजय गांधी निराधार योजना विभागाचे तहसीलदार राहुल वानखेडे यांची वाशिम येथे बदली करण्यात आली आहे.