जुने शहरातील कुख्यात गुंड एक वर्षासाठी स्थानबद्ध

अकोला पोलिसांनी केली एमपीडीए अंतर्गत कारवाई

अकोला : जुने शहर पोलीस ठाण्याच्या हद्दीतील अंबिका नगर येथील रहिवासी तसेच कुख्यात गुंड शेख जुनेद शेख निजाम यास जिल्हाधिकारी, पोलीस अधीक्षक जी श्रीधर यांच्या आदेशानंतर शनिवारी जिल्हा मध्यवर्ती कारागृहात एक वर्षासाठी स्थानबद्ध करण्यात आले आहे. पोलीस अधीक्षक जी श्रीधर यांनी गुन्हेगारांचे कंबरडे मोडण्यासाठी हा सपाटा सुरू केला असल्याची माहिती शहर पोलीस उपअधीक्षक सचिन कदम यांनी येथे आयोजित पत्रकार परिषदेत दिली.

जुने शहर पोलीस ठाण्याच्या हद्दीतील अंबिका नगर येथील रहिवासी शेख जुनेद शेख निजाम (वय २२) हा कुख्यात गुंड असून, पोलिसांच्या कारवाईला जुमानत नसल्याचे समोर आले. त्याच्याविरुद्ध यापूर्वी गंभीर स्वरूपाचे १२ पेक्षा अधिक गुन्हे दाखल असून, यामध्ये दुखापत करणे, शिवीगाळ करणे, जिवे मारण्याची धमकी देणे, बेकायदेशीररीत्या शस्त्र बाळगणे, विनयभंग करणे, खंडणी मागणे, विविध आदेशाचे उल्लंघन करणे या गुन्ह्यांचा समावेश आहे. पोलिसांनी त्याच्यावर प्रतिबंधात्मक कारवाई केली; मात्र या कारवाईला जुमानत नसल्याने त्याच्याविरुद्ध एमपीडीए अंतर्गत मध्यवर्ती कारागृहात एक वर्षासाठी स्थानबद्ध करण्यासाठीचा प्रस्ताव जिल्हाधिकारी जितेंद्र पापळकर यांच्याकडे सादर करण्यात आला. जिल्हाधिकाऱ्यांनी या प्रस्तावाला मंजुरी देऊन या आरोपीला एक वर्षासाठी स्थानबद्ध करण्याचा आदेश पारित केला. त्यानंतर पोलीस अधीक्षक जी श्रीधर, अतिरिक्त पोलीस अधीक्षक मोनिका राऊत, शहर पोलीस उपअधीक्षक सचिन कदम यांच्या मार्गदर्शनाखाली पथकाने आरोपीचा शोध घेऊन त्यास जिल्हा मध्यवर्ती कारागृहात एक वर्षासाठी स्थानबद्ध केले आहे. ही कारवाई स्थानिक गुन्हे शाखेचे प्रमुख शैलेश सपकाळ, जुने शहरचे ठाणेदार महेंद्र देशमुख, मंगेश महल्ले यांनी केली. या पत्रकार परिषदेला शहर पोलीस उपअधीक्षक सचिन कदम, जुने शहरचे ठाणेदार महेंद्र देशमुख व वाहतूक शाखेचे प्रमुख गजानन शेळके उपस्थित होते.