टँकरच्या अपघातात एक ठार

दाळंबीनजीकच्या एका धाब्यावर गॅस वाहून नेणाऱ्या टँकरखाली सापडून एका ४० वर्षीय इसमाचा मृत्यू झाला. ही घटना सोमवारी सायंकाळी चार वाजेदरम्यान घडली. अकबर शहा असे मृतकाचे नाव आहे.

प्राप्त माहितीनुसार राष्ट्रीय महामार्गावरील दाळंबीनजीकच्या एका धाब्यावर गॅस वाहून नेणारा टँकर क्रमांक एम.एच. ३१ एफ.सी. ४०३९ हा मोकळ्या जागेत थांबला होता, दरम्यान, सदर टँकरचालक परत आपला टँकर घेऊन अकोलाकडे जाण्यासाठी निघाला असताना धाब्याच्या आवारात टँकरमुळे अपघात झाला. दरम्यान या टँकरच्या खाली सापडून अकबर शहा हुसेन शहा ‘वय ४०, रा. दाळंबी) यांचा घटनास्थळावरच धाब्यावर मृत्यू झाला. सदर अपघात कसा झाला हे समजू शकले नाही. घटनेची माहिती मिळताच हेड कॉन्स्टेबल अरुण गोपनारायण, राजू चव्हाण, सैनिक देशमुख, माळोकार यांनी घटनास्थळी धाव घेऊन घटनेचा व मृतदेहाचा पंचनामा करून सदर मृतदेह उत्तरीय तपासणीसाठी मूर्तिजापूर येथील रुग्णालयात दाखल केला.