सावरगाव येथे आठवडाभरापासून व्हायरल फिव्हरची साथ!

सावरगाव येथे आरोग्य उपकेंद्र असून, त्या ठिकाणी आजारी रुग्णांवर थातुरमातूर उपचार केला जात असल्याचा आरोप होत आहे. त्यामुळे रुग्ण खासगी डॉक्टरकडे धाव घेत असून रुग्णांना आर्थिक भुर्दंड सहन करावा लागत आहे. गेल्या आठवडाभरापासून सावरगाव येथे तापाची साथ सुरू आहे. रुग्णांना वेळेवर उपचार मिळत नसल्याने रुग्णसंख्येत दिवसेंदिवस वाढ होत आहे. एका घरात चार-चार सदस्य आजारी पडले आहेत. सर्दी, ताप, खोकला आदींचा त्रास असलेल्या रुग्णांची संख्या सर्वाधिक आहे. संबंधित आरोग्य विभागाने वेळीच दखल न घेतल्यास व्हायरल फिव्हरची साथ मोठ्या प्रमाणात वाढण्याची शक्यता आहे. यामध्ये लहान मुले, वृद्ध, तरुणांचा समावेश आहे.

घरोघरी जाऊन सर्व्हे करण्याची गरज

गावातील आरोग्य विभागाच्या उपकेंद्रात रुग्ण उपचारासाठी जातात; परंतु त्या ठिकाणी रुग्णांना दोन ते तीन गोळ्या देऊन परत पाठविले जाते. त्यामुळे तापाचे रुग्ण कमी होण्यापेक्षा वाढत असल्याचे चित्र पाहावयास मिळत आहे. संबंधित आरोग्य विभागाच्या वरिष्ठांनी दखल घेऊन गावात घरोघरी जाऊन सर्व्हे करून आजारी असलेल्या रुग्णांवर उपचार करण्याची गरज आहे.

औषधींचा तुटवडा; रुग्ण त्रस्त

सावरगाव येथे आरोग्य उपकेंद्रामध्ये अनेक औषधींचा तुटवडा असल्यामुळे रुग्ण खासगी डॉक्टरकडे धाव घेत आहेत. त्यामुळे रुग्णांना आर्थिक भुर्दंड सहन करावा लागत आहे. गावात आजारी रुग्ण असल्याची माहिती आरोग्य विभागाला असतानाही याकडे संबंधित आरोग्य विभागाचा कानाडोळा होत असल्याचा आरोप रुग्णांकडून होत आहे.

आरोग्य उपकेंद्रामध्ये अनेक औषधींचा तुटवडा आहे. त्यामुळे रुग्णांवर ठोस उपचार होत नसल्याने रुग्णांना खासगी डॉक्टरकडे धाव घ्यावी लागत आहे. संबंधितांनी वेळीच दखल घेऊन आजारी असलेल्या रुग्णांवर उपचार करावा, अन्यथा व्हायरल फिव्हरच्या रुग्णांमध्ये वाढ होण्याची शक्यता नाकारता येत नाही.

- गोपाल राठोड, प्रहार सेवक, सावरगाव