वाशिम बायपासवरून पेट्रोल-डिझेलचा टँकर लंपास !

दुसऱ्या टँकर चालकाच्या सतर्कतेमुळे प्रकार उघड

अकोला : वाशिम बायपासजवळील एका अपार्टमेंटसमोरून १२ हजार लिटर डिझेल-पेट्रोलने भरलेला टँकर चोरी गेल्याची घटना २६ जूनच्या रात्री उघडकीस आली. हा प्रकार एका दुसऱ्या टँकरचालकाच्या जागरूकतेमुळे उघड झाला असून, पोलिसांनी टँकरचा शोध सुरू केला आहे.

गायगाव येथून नांदेडसाठी टँकर (एम.एच.३०-एबी-२९९९) यामध्ये ६ हजार लिटर डिझेल आणि ६ हजार लिटर पेट्रोल भरून निघाला होता. मात्र टँकर नादुरुस्त झाल्याने तो वाशिम बायपासवर दुरुस्तीसाठी उभा करण्यात आला, रात्री उशिरापर्यंत टँकर दुरुस्तीचे काम न झाल्याने, टॅंकरचा चालक सय्यद फारूक सय्यद मुजफ्फर (रा.हमजा प्लॉट, जुने शहर) त्याच्या घरी निघून गेला. याच ठिकाणी महेश मनोहरलाल चावला यांचा यवतमाळसाठी पेट्रोल-डिझेल घेऊन जाणार आणखी एक दुसरा टॅंकर उभा होता. यवतमाळसाठी जाणारा टॅंकर २६ जून रोजी सकाळी पिंजरमार्गे यवतमाळसाठी निघाल्यानंतर या टँकरचा चालक मोहम्मद हारून याला रात्री दुरुस्तीसाठी उभा असलेला टॅंकर (एम. एच.३०-ए. बी.२९९९) पिंजरजवळरोडच्या कडेला उभा असल्याचे दिसले. यावरून नांदेडसाठी निघालेला टॅंकर या दिशेने कसा आला, याची माहिती मोहम्मद हारून याने टॅंकरमालक महेश चावला यांना दिली. त्यावरून चावला यांनी नमूद टँकरबाबत चालक सय्यद फारूक याला विचारले असता, त्याने टॅंकर बायपास येथे उभा केला होता, असे सांगितले. एकूणच प्रकारावरून टॅंकरचोरी झाल्याचे चावला यांच्या लक्षात आल्यावर या प्रकरणाची तक्रार जुने शहर पोलीस ठाण्यात दिली. या तक्रारीवरून कलम ३७९ नुसार अज्ञात व्यक्ती विरोधात गुन्हा दाखल करण्यात आला आहे.

पोलिसांनी गाठले घटनास्थळ

घटनेची माहिती मिळताच जुने शहर पोलीस ठाण्याचे ठाणेदार महेंद्र देशमुख आणि स्थानिक गुन्हे शाखेचे प्रमुख शैलेश सपकाळ ताफ्यासह घटनास्थळी दाखल झाले. तपासाच्या दृष्टीने घटनास्थळी श्वान पथकाला पाचारण करण्यात आले. मात्र काहीही हाती न आल्याने सीसीटीव्ही फुटेजच्या माध्यमातून तपास सुरू करण्यात आला आहे.

सीसीटीव्ही फुटेजची तपासणी

वाशीम बायपास परिसरातील सीसीटीव्ही कॅमेऱ्याचे फुटेज या चोरीचा छडा लावण्यासाठी ताब्यात घेण्यात आले. चोरट्यांचा मागोवा घेण्यासाठी वेगवेगळे पथक गठित करण्यात आले आहे. या चोरीच्या प्रकरणात १२ लाख रुपयांचा पेट्रोल-डिझेल चोरीला गेले आहे.