अकोला : वाशिम बायपासवरून पेट्रोल-डिझेलचा टँकर लंपास

Petrol-diesel tanker stolen from Washim bypass : १२ हजार लिटर डिझेल-पेट्रोलने भरलेला टँकर चोरी गेल्याची घटना २६ जूनच्या रात्री उघडकीस आली.

अकोला : जुने शहर पोलीस स्टेशनच्या हद्दीतील वाशिम बायपास जवळील एका अपार्टमेंटसमोरुन १२ हजार लिटर डिझेल-पेट्रोलने भरलेला टँकर चोरी गेल्याची घटना २६ जूनच्या रात्री उघडकीस आली. हा प्रकार एका दुसऱ्या टँकर चालकाच्या जागृकतेमुळे उघड झाला असून पोलिसांनी टँकरचा शोध सुरू केला आहे.

 

गायगाव येथून नांदेडसाठी टँकर क्रमांक एम.एच.३० - एबी - २९९९ यामध्ये ६ हजार लिटर डिझेल आणि ६ हजार लिटर पेट्रोल भरून निघाला होता. मात्र टँकर नादुरुस्त झाल्याने तो वाशिम बायपासवर दुरुस्तीसाठी उभा करण्यात आला, रात्री उशिरापर्यंत टँकर दुरूस्तीचे काम न झाल्याने, टॅंकरचा चालक सैय्यद फारूक सैय्यद मुजफ्फर रा.हमजा प्लॉट जुने शहर त्याच्या घरी निघून गेला. याच ठिकाणी महेश मनोहरलाल चावला यांचा यवतमाळसाठी पेट्रोल-डिझेल घेऊन जाणार आणखी एक दुसरा टॅंकर उभा होता. यवतमाळसाठी जाणारा टॅंकर २६ जून रोजी सकाळी पिंजरमार्गे यवतमाळसाठी निघाल्यानंतर या टँकरचा चालक मोहम्मद हारून याला रात्री दुरुस्तीसाठी उभा असलेला टॅंकर क्रमांक एम. एच.३०-ए. बी.२९९९ पिंजर जवळ रोडच्या कडेला उभा असल्याचे दिसले. यावरून नांदेडसाठी निघालेला टॅंकर यादिशेने कसा आला, याची माहिती मोहम्मद हारून याने टॅंकर मालक महेश चावला यांना दिली. त्यावरून चावला यांनी नमूद टँकरबाबत चालक सैय्यद फारूक याला विचारले असता, त्याने टॅंकर बायपास येथे उभा केला होता असे सांगितले. एकूणच प्रकारावरून टॅंकर चोरी झाल्याचे चावला यांच्या लक्षात आल्यावर या प्रकरणाची तक्रार जुने शहर पोलीस ठाण्यात दिली. या तक्रारीवरून कलम ३७९ नुसार अज्ञात व्यक्ती विरोधात गुन्हा दाखल करण्यात आला आहे.

 

पोलिसांनी गाठले घटनास्थळ

घटनेची माहिती मिळताच जुने शहर पोलीस ठाण्याचे ठाणेदार महेंद्र देशमुख आणि स्थानिक गुन्हे शाखेचे प्रमुख शैलेश सपकाळ ताफ्यासह घटनास्थळी दाखल झाले. तपासाच्या दृष्टीने घटनास्थळी श्वान पथकाला पाचारण करण्यात आले. मात्र काहीही हाती न आल्याने सीसीटीव्ही फुटेजच्या माध्यमातून तपास सुरू करण्यात आला आहे.